鐵飯碗咖啡屋 - 豉油街的娘惹風情

食物：$$$1/2
環境：$$$$
服務：$$$1/2

從朋友的IG得知，旺角新開左間南洋餐館，對於我呢個馬拉菜迷來講，絕對是喜訊，好想盡快去回一回佢。

機會話嚟就嚟，是日正好要出旺角交收東西，完事後馬上去食番個午餐。

餐廳唔止一層，但筆者在中午最繁忙的時間來到，樓上仍未有開放，或者正確啲講，係一層都坐唔晒。

坐低周圍望下，牆上有唔少璧畫，亦放了些娘惹擺設，營造馬來西亞風情。

QR Code下了單，要先到櫃枱俾錢，才會有嘢食送來。

午餐價錢算親民，大部份都是六十八個大洋，已包基本嘢飲，包括我哋揀既梅子蒸鱸魚塊飯，與及墨魚餅咖喱撈麵。

鱸魚全塊都無骨，啖啖肉岩唔識吮骨既我。火侯控制唔錯，肉嫩，結合酸菜及梅子帶出醒胃感覺，幾好下飯。

墨魚餅咖喱撈麵，咖喱味蜻蜓點水，還幸麵條爽口，沒惱人的鹼水味，最驚喜是發現豬油渣的蹤跡。魚蛋及墨魚餅都做到本份，至少彈牙，但因為咖喱味不強，索味的豆卜變得無用武之地，可惜！

斑蘭薏米水屬基本飲品，無須加錢，那就沒有太高要求。

下次試試仍既Kopi~

餐廳資料:
鐵飯碗咖啡屋
旺角豉油街36-42號榮高大廈地舖至2樓
61219960