永8舫 - 酒店以外的好選擇

食物：$$$$
環境：$$$$
服務：$$$$ 

喜歡跟年青人對話~

又是與年青人午餐的日子，地點由我決定，知道佢哋中意食中式糕點 (後生仔女竟然中意!)，便選了灣仔的永8舫。

雖然我都係第一次到訪，但可以肯定環境裝潢會好靚好有格調，皆因店子的設計是出自國際級大師Steve Leung的手筆，已經唔使再多講其他。

週末有套餐供應，有齊點心、湯水、飯麵及糖水，兩舊幾水落到樓，單係食裝修都抵番。再講，其實佢啲出品都好唔錯。

點左兩個套餐，再散點些少嘢，三條友夠食有餘了。套餐有翅食，影完相後，我就將之讓俾兩位後生仔女。

可揀六款點心，松露腐皮卷是店員的推介，充滿松露醬及菇香，外皮鬆脆，新鮮炸起夠熱辣，果然無介紹錯。

咸水角造成啤梨形狀已不是什麼新鮮事，呢度仲會做埋個顏色，更加極致。咬落鬆脆，餡料很香，唔係呃Like出品，好睇又好食。

黑蒜燒賣坊間罕見，披上黑色外衣，感覺高貴。除左飽滿，彈牙，還嚐到點點黑蒜氣息，不是為創新而創新。

相比之下，蝦餃就來得傳統，皮不厚，晶瑩，餡料足，蝦肉爽，都係五星級酒店水準。

腸粉挑了兩款，按人頭俾份量，叉燒腸及牛肝菌腸粉，兩款既皮都唔錯，個人會比較喜歡後者，好香。

食炒飯和伊麵之前，睇睇散點的蝦多士。四方型的細細件，沒有鳳尾露出的氣勢，但咬落鬆脆彈牙不在話下，沙律醬更已釀入其中，難怪沒有跟上汁醬。

永８炒飯，用埋店名，應該耍家。的確，出品是乾身爽口，粒粒分明。不過個人更欣賞龍皇海鮮炆伊麵，質地爽身，滿有水準。

套餐的糖水是蛋白杏仁茶和陳皮紅豆沙，俱不俗，紅豆沙有陳皮香，煲到起沙，我清碗。

香芒糯米卷雖然軟熟，可惜芒果有丁點酸，是美中不足的地方。

記低呢個地方，下次可以再訪~

餐廳資料:
永8舫
灣仔軒尼詩道318號永倫立方2樓
21215188