源峰 - 很瘋狂的鍋物套餐

食物：$$$$
環境：$$$$
服務：$$$$ 

對帝逸酒店的日本餐廳源峰一直有好感，但礙於地點比較偏遠，所以惠顧的次數算不上很多。

難得久未露面的朋友搞局，仲要係呢度，即使攀山涉水，我也在所不辭。

盡趕，卻仍是最遲到埗的一位，要大家等，實在不好意思。

率先來的沙律，菜蔬加上白舞茸、白占地茸等菇菌類，與及爆汁的三文魚籽，清爽又開胃。

接下來的幾款刺身，不論爽身的池魚和金目鲷，或是甜美的牡丹蝦及北海道帶子，定係入口融化的拖羅，全都是十級新鮮，人人讚好。

茶碗蒸除了熱度足，也是我嚐過最足料的出品，好誇張的。

鰤魚好厚身，皮脆而肉緊緻，但唔係死實實，照燒做法吸引，吃罷再嚐粒旁邊的小紅莓，正好中和魚油的膩感，師傅呢個安排非常好。

再來的野菜海老天婦羅，份量蠻多，佢係鬆脆好吃的，不過細食既我亦只好留肚，否則根本無可能應付之後的龐然大鍋物 (雖然最終都係無法完成)。

鍋物有幾款選擇，不管你是海鮮控、牛魔王，抑或是豚肉支持者，都不愁沒選擇。

看朋友的豪華海鮮寄世鍋，相當足料吸引。而我的選擇，也就是壽喜燒，畢竟我都是徹頭徹尾的食肉獸。五件和牛緊緊地捲起，仲有一大盤的野菜，同埋烏冬，份量會否太過驚人? Anyway，和牛的質素很好，在甜醬油湯底下輕輕拖一拖，香甜軟滑，而野菜吸取了湯底的精華，魅力倍增。

甜品是布甸，味道是楊枝甘露，清新！

呢個鍋物套餐既份量真係唔嘢少，記緊留肚保持戰鬥力，否則難以應付。

餐廳資料:
源峰
沙田源康街1號帝逸酒店28樓
36531115