Fabrice 嚐味: 廚魔名人坊

2023年2月9日星期四

廚魔名人坊 - 強強聯手

食物：$$$$
環境：$$$$
服務：$$$$

人稱廚魔既Alvin Leung，完全係一個傳奇性既人物。工程師出身，沒有正式學過廚，卻成為了舉世聞名既餐飲界人物，在香港、英國、加拿大、杜拜，以至台灣都有佢既餐廳，香港的Bo Innovation，更加多年摘星，至今依然係二星店，大家應該未食過都聽過。

富哥，中菜界既殿堂級人馬，曾經做過林百欣的私人廚師，當年在中環九如坊開設既名人坊亦帶來一時佳話。

當呢兩個餐飲界既經典人物碰頭，合作打造出來的『廚魔名人坊』，到底會係點樣既一回事?

先講下在九如坊年代已經係名物既燕窩釀鳳翼，雞翼色澤金黃，飽滿靚仔，收口位做得非常好，盡顯師傅既功架。用刀叉切開，就看見裡頭滿滿的燕窩，份量好足。咬落外皮香脆，燕窩本身無味，用上湯燴過即變得爽甜，呢份經典菜色，一直保持水準。

咕嚕肉又係富哥既拿手好戲，呢度既出品同坊間有啲唔同，會切成薄片，入口鬆化有彈性，加上洋蔥、菠蘿、黃椒，以及恰到好處既汁醬，係好食既。

之後來幾款點心，咸水角外型唔算十分標緻，不過外皮鬆脆，中層軟糯唔黏牙，餡料夠味，屬實而不華之作。

鳳爪既肉質緊緻，有咬口，唔會話死咸，我最怕食啲又重味又腍pat pat既鳳爪，呢度既就岩我心水。

流沙包你可以視之為甜品，但我就當佢係咸點，沒有留到最後才吃。包身軟熟，咬落隻包，奶皇緩緩流出，夠濃夠香，不會為左流心而搞到鬼咁稀。

臨尾本想食個富哥炒飯，不過諗諗下，之前兩款都係富哥既招牌嘢，不如試試廚魔推介既和牛松露炒河? 河粉之上鋪滿薄片的和牛，頂頭灑上蔥花及松露，賣相是很好的，而且上枱時香噴噴好吸引。河粉炒得好，唔會痴埋一舊舊，和牛是澳牛產，味道好濃郁，食唔慣既朋友甚至有可能會覺得羶。再講，呢度既XO醬都好正，香而唔太辣，要來撈河粉岩晒。