食物：$$$1/2
環境：$$$1/2
服務：$$$
飲食界既前輩最近出左本書，其中一章係『做移民前的最後100餐』，單係個名，已知道與我哋息息相關。畢竟近排太多太多朋友移居外地，食farewell飯已經成為左生活既一部份。
講左好耐，呢位識於微時既朋友真係要走，同佢食既最後晚餐，當然係由主角話事，佢揀左去鴨脷洲食海鮮。
我要返工，係街市樓下檔口買海鮮既重任，反而要交俾主角去做。或者仲好喇，佢想食咩就買咩，之後拎去樓上既珠記度加工。
主角中意食蠔，買左一桶，係台山蠔。請師傅來個薑蔥炒蠔。台山蠔身型自然沒有美國蠔咁巨大，但隻隻飽滿，勝在蠔味更突出，我更喜歡。
跟住既蒜茸粉絲蒸扇貝，睇賣相已比舊年來食時馬虎左好多。但扇貝總算嫩口，裙邊位帶微脆，夾埋粉絲同埋蒜茸食，味道可以。
不過，再來既油鹽水浸蟶子就真係唔得。蟶子好多沙，吃起來是『烚烚聲』，味道再好都係假。
豉椒炒蜆就正常番啲，惹味之餘，起碼無沙。
黑椒鮑魚係呢度既名物，每次來都要食。先蒸再上粉輕輕的炸，外微脆，內裡軟嫩又彈牙，唔會韌到食唔到，加上黑椒既辛香，依舊保持水準。
上湯龍蝦煎米粉，我哋買既係本地龍蝦，質感與味道真係無得輸，完全唔係波龍南非龍，甚或澳洲龍蝦可以媲美。肉質爽彈又唔韌，很鮮甜的味道，真心正。連帶墊底米粉都做到外脆內軟，夠晒入味，係住晚數一數二出色既菜色。
豉油皇大蝦，並不是街市買上來加工，啲蝦真係不堪入目。
叫窩西湖牛肉羹俾小朋友，湯頭夠熱，芡打得不太厚，入口幼滑可口，大人小朋友都中意。
文章出街既時候，朋友已在英國過緊佢既新生活，祝願佢哋一家生活愉快。
真係好怕有沙，希望你朋友一家早日適應新環境！
回覆刪除佢地應該都幾好 :)
刪除