蘇浙滙 - 仍然喜歡素鮑魚

食物：$$$$
環境：$$$$
服務：$$$$ 

今次介紹既呢間蘇淅滙，係米芝蓮星店嚟講，算是比較容易有位既一間。即使在假日的中午及晚上繁忙時間，都有機會Walk In。

廢話少說，直接睇下嘢食。素鮑魚係蘇浙滙既招牌菜，不論香港定澳門都做得出色。造型係有幾分似。廚師已細心咁切好一片片，食得更方便。這『鮑魚』既質感爽脆，口感有少許似吃菇，加上入味之醬油，係好食既，值得一試。

另一款又係招牌菜，黑叉燒。有別於在粵菜館子嚐到的叉燒，醬汁係好上海式黑漆漆又濃的甜醬油，叉燒本身亦有7、8成肥，咬落像吃金錢雞那塊爽爽的冰肉，好吃，但極之邪惡。

叉燒好重口味，但蝦仁鍋巴卻是異常地淡口。鍋巴是鬆脆的，本身沒問題，但整碗的河蝦仁、露筍等都是淡而無味，還以為自己的味蕾出了毛病。

四川人做樟茶鴨，會選細細隻，當涼菜食。上海則會揀身型較大的，視之為主菜。然而，兩者相同既地方都係工序複雜，吃起來滿滿煙燻香。今日食到既呢隻，肉質還十分嫩滑。喜歡的話，沾些汁醬，酸酸甜甜好醒胃。

小籠包既皮唔算薄，所以夾起唔易穿。欣賞佢收口位做得好，唔會一大粒實的的咁，豬肉餡味道可以，也有一定的湯汁，合格了吧！

最摸不著頭腦是印尼蝦餅，為何會在餐牌中出現，而我們又咁Seven咁點上呢！蝦餅不是脆口的版本，反而是煙煙韌韌，加半隻開了邊的蝦，叫做見識過喇。

以為會要加餸，但食食下都幾飽，可直接跳入甜品環節。個人好中意食楊枝甘露，所以明明這不是滬式甜品，我也點上。足料，酸甜度恰好，夠冰凍，比好多粵菜館子更勝一籌。

另一款的冰皮抹茶凍糕，賣相幾靚仔，淡淡既抹茶味，感覺就是在吃冰皮月餅。

下次人多啲，再嚟食醉羔蟹～

餐廳資料:
蘇浙滙
灣仔港灣道30號新鴻基中心地下G3–4舖
35280228