山下 Sanka - 強手

食物：$$$$

環境：$$$$

服務：$$$$

濶太生辰，做細既筆者當然不敢怠慢，老早跟他夾好日期時間，同埋心水餐廳。

佢好快提出兩家食肆，其中包括這所Sanka Teppanyaki。其實，正中我下懷，因為這店早已在我的Wish List之中。

無記錯既話，去年佢牛一都係食鐵板燒，是找Mok San。

        

分別選了龍蝦及和牛為主食的午餐，大家些牙食，師傅會為我們分妥的了。一開始先來個鮑魚茶碗蒸，雞蛋蒸得滑溜，最重要是夠熱，鮑魚切成薄薄幾片，自然唔會韌，硬要挑剔的話，是稍為咸了丁點。

接著來的沙律，顏色配搭得好靚，以一只玻璃碟作盛器，顯得份外高貴。各式沙律菜新鮮是理所當然，因此即使不用加太多Dressing，已經清爽可人。

套餐原本是跟上香煎帆立貝，可惜是日缺貨，師傅以千葉縣的蜆來取締，我沒有異議。火侯控制恰到好處，蜆肉鮮嫩，但我更欣賞的是那醬汁，好吃得非筆墨所能形容，一百個讚。師傅只透露是豉油和牛油來造成，邊有咁簡單？

龍蝦好容易煮得過熟，即便是在五星級酒店我都瀨過唔少嘢。師傅非泛泛之輩，火侯拿捏得精準，龍蝦肉嫩且保持彈性，龍蝦鉗自然更加嫩滑鮮甜，配合埋濃香的干邑醬，輕易俘虜我的心。

入口溶化的黑毛和牛西冷，當然是最頂級的A5和牛。鬆化又滿載脂香，根本不用醮任何汁醬，夾埋炸蒜片食就係一流。一旁的洋蔥，沾些醒胃的酸汁來吃，正好中和牛肉的膩滯感覺。

看似簡單的東西，就最考功夫。如這味招牌的蒜茸炒飯，炒得粒粒乾身又分明，而且充滿蒜茸香氣。細食既我，是極罕有地可以食鐵皮燒清掉整碗炒飯的。單是呢碗飯，已是要再次到訪的理由。

驟眼看猶如海膽的芒果雪葩，在吞下多味濃香食物後品嚐，是非常合適的甜品。

再以一杯香濃的咖啡作結尾。呢一餐，筆者是相當滿意的，我亦頗肯定濶太有相同的睇法。

餐廳資料:
山下 Sanka
中環士丹利街11號1樓
34602285