Kura - 幸福滋味

食物：$$$$

環境：$$$$

服務：$$$$

雖然近半年大家既心情都唔慌好得去邊，但偶爾都要找個藉口食餐好啲去平衡下，譬如話區選之後就是個好理由，否則屈屈埋真係人都癲。

想舒舒服服慢慢傾、慢慢歎，所以便決定去食Omakase，食足成晚都得。

選了價值$1680的幸福Koufuku，師傅問過各位有什麼不吃之後，大家就將個舞台交俾師傅表演。

        

一開波師傅便為大家炮製鮟鱇魚肝，素有海底鵝肝之美譽的好東西，醇香誘人，質感化綿，留下良好印象。

接著來的鮑魚富有彈性，沒有過韌，醮肝醬食肯定是好。為不浪費肝醬，師傅還很細心，切幾條烏冬仔讓大家來沾配，我是將肝醬吃得一滴不剩。

之後是刺身環節，爽脆的平政魚味道亦濃，與醒胃的酸汁太合拍，清爽可口。

再來是『雙拼』，帆立貝與螺片。前者爽脆，後者軟滑而鮮味爆發，我喜歡。

正值沙甸魚的當造期，魚肉特別肥美且味濃，簡單以脆口的紫菜包裹著，已很美味，夾點點蔥花，更收畫龍點睛之效。另一款味道濃郁的鰹魚，質感尤其合我心。

引頸以待，大拖羅終於登場，師傅更將之火灸過，入口溶化之餘，還多一份香氣，夾埋有性格既紫蘇葉，以及紫菜來吃，好有幸福既感覺。

以漬物作間場，其後一系列的熱食便要爭相登場。漬蒜子最岩我這類重口味人士。

首道熱食係蟹肉百合饅頭，看賣相也有幾分像中式的食品，吃起來軟滑，亦不失絲絲蟹肉的鮮美，有趣。

燒龍蝦的火侯控制恰到好處，加埋牛油來燒，想唔好食都難。旁邊的小螃蟹，炸得透徹，脆卜卜的口感肯定正，唯味道是咸了一丁點。

繼而，是一連串的壽司。飯糰握得好，口感軟熟唔死實，味道已經調好，不用自行沾豉油芥末吃。不管是北寄貝、鰤魚、喜之次，或是牡丹蝦，應爽脆有爽脆，要鮮美有鮮美，牡丹蝦連埋甘香蝦羔，尤其精彩。

油潤的拖羅壽司，溶在咀巴內，脂香充斥口腔，認真不得了。要講極品，當然又不會走漏了北海道雲丹，鮮味在口中爆發的感覺，非筆墨所形容。師傅再將吞拿魚手卷遞給我，企圖把我的幸福滋味延續。

太飽了，即使是清香的松茸魚湯，我也無法完成。

以一件軟熟的千層蛋糕，同埋清甜多汁既靜岡蜜瓜，為這豐富又美味的師傅發辦畫上完滿的句號。

餐廳資料:
Kura
銅鑼灣謝斐道482號1樓
31253133