新店速遞：夏捌月 - 八月，殺入荃灣

食物：$$$

環境：$$$1/2

服務：$$$1/2

元朗有間中價西餐廳夏捌月，最近殺了入荃灣，網上風評不錯，間中經過都見佢有人排隊，勾起我來試的念頭。

有時不太明白，為何那麼多元朗的小店揀進駐荃灣？Any肥，把握在八月尾，捉埋老爸去嚐夏捌月，岩晒『何車』～

新屎坑，點都會香一陣子。為免要排長龍，選了個下雨天的中午前來，應該無咁多人卦？！

   

點了份午餐後，餐湯隨即奉上，周打魚湯，尚算濃郁，足料，沒有投訴。

平日我多半會食Carbonara，焗豬就是老豆既頭號選擇，不過是日竟『撈亂骨頭』，佢話要吃卡邦尼意粉。

我嚐了一小撮，醬汁唔夠充裕，吃起來感覺有點乾，煙肉亦有欠香口，水準爾爾。

至於焗豬扒飯，端上來是香噴噴，面頭帶微微焦燶，賣相是吸引。然而，豬扒質感腍得有點假，不是我所喜好的，幸而整體味道尚且合格。

喝的挑了樽仔奶茶，當然不是什麼新鮮事，原理是避免冰粒溶化而影響奶茶之味道，出發點是好。可是，這奶茶雖滑，但味道不似預期。

或者，是我期望過高了吧！

餐廳資料:
夏捌月
荃灣荃灣登發街10號地舖
52099433