大煲皇海鮮菜館 - 冬至麻甩飯

食物：$$$1/2

環境：$$$1/2

服務：$$$$

之前已一家人吃過飯做冬，冬至正日，隨便吃些東西就好，無須太講究。

忽然想食麻甩小炒，不如出長沙灣？

臨時臨急，禤師傅肯定沒有位了。什麼「隱世廚神餐廳」森記都要等四張枱，過節真係麻鬼煩。結果來到了大煲皇海鮮菜館。

 　　

大煲皇，荃灣及長沙灣都有分店，專門吃火鍋。呢間海鮮菜館，新開無耐，是長沙灣店的延伸，可打邊邊可吃小菜。

過時過節，連呢類麻甩菜館都人山人海，坐滿一家大細在做節。

一心想食小炒，就不打邊爐了。忘了何時開始，老媽子愛上了肥膩嘢，梅菜扣肉是佢點的，與我無關。呢份扣肉，於我而是偏瘦，只有頭尾兩三件是甘香廿美，可幸質感仍鬆化，梅菜都唔會死咸。

以白飯來伴之，善用每滴醬汁，才是皇道。

另外的小炒王，韭菜、魷魚、腰果、蝦乾等，全部炒埋一碟，麻甩到痺，風味搭夠。

最後是南乳粗齋煲，份量廷大，白菜仔、茄子、粟米仔、木耳、豆卜，諸如此類，有乜落乜。我反而覺得唔夠南乳的香，有欠惹味。此品又令我想起御寶軒，正到無倫，大家有無興趣組團去歎番餐糯米豬和粗齋煲呢？

始終是冬至，吃飽飽，到附近的糖水店食湯丸吧！

餐廳資料:

大煲皇海鮮菜館

長沙灣青山道155號天悅廣場地下