冠荃 - 全為一杯靚奶茶

食物：$$$$

環境：$$$

服務：$$$1/2

既是荃灣人，又是奶茶迷，本人經常會在荃灣捐窿捐罅找靚奶茶飲的。

飲奶茶好睇個人口味，茶濃茶淡，奶多奶少，人人不同。純粹個人喜好，工廠區的冠荃，以及鐵皮檔的鄭榮記，最討我歡心。

然而，以上兩店，晚上及星期天均是不營業的，公開飲食網站的資料並不準確，大家要留意，千祈唔好摸門釘。

你去茶餐廳，都唔會淨飲杯嘢啦，尤其是呢間由開鋪旺場到收鋪的店子，即使你肯俾雙計，都唔好阻住地球轉。

    

中午時份，不論你食午餐定散點，總會奉送例湯。當然你不會期望是什麼老火湯，至少唔係師姑尿咁淡，亦不是味精滿瀉。

我來此，許多時會吃燒味飯，一碟叉燒切雞雙拼飯，仲要俾埋髀位你，只是四十個銀錢，仲想點？

雞髀位，定必嫩滑。一時唔記得交帶阿姐，叉燒來時是偏瘦，還好口感仍鬆化，邊邊位帶點燶，咁既價錢有咁既水準，收貨有餘。

從來不太喜歡以薑蔥/蔥油沾雞，用來撈飯才是王道，多多益善，三兩下手勢可以幹掉整碟飯。

講開又講，間中都會來吃下午餐，佢有粉麵茶餐，河粉或者技泰式金邊粉，肉丸、泰式雞翼、香茅豬扒等都好受歡迎，勝在價錢合理，水準穩定。

入口細滑，茶香又不失奶味的熱奶茶，醒神！

餐廳資料:

冠荃

荃灣大涌道8號TCL工業中心地下1號舖

24052345