古琴雅苑 - 新鴨店

食物：$$$1/2

環境：$$$1/2

服務：$$$1/2

忽然流口水，唔是柏金遜症發作，只係諗起美味的片皮鴨。

心動，不如行動吧～

兩星期前，曾嚐過國內名店羲和雅苑在海港城的新店，烤鴨合格，其他食物有驚喜，還附送無敵維港景，價錢仲十分合理，是要翻兜的地方。

然而，今次唔係翻兜既時候，因為又有另一間新鴨店，值得光臨的，正是灣仔的古琴雅苑。

    

大家都叫雅苑，大家個名字都咁有詩意，兩者其實有無關係？朋友問。

正確答案，是無的。

大概又係新屎坑既關係，開業無耐，已經巧多客人，好彩醒目朋友已預先留了房訂好餸。

先來幾款冷盤熱下身，海蜇與青瓜，兩種不同的爽脆口感；水晶肉偏瘦，還幸質感唔怕死實實；花雕醉雞肉質不會嚡口，但酒香可以多番點；最欣賞是無錫脆鱔，香脆可口。

收起涼菜的碟子，飲番碗上海湯醃篤鮮才再吃鴨。或許各位早已知道，「醃」是咸肉，「鮮」指鮮肉，「篤」則燉的意思。當然，除了咸肉與鮮肉以外，還必定會有筍和百葉結。這裡的醃篤鮮，既有咸香味，也有筍的清香，很不錯，我喝得一滴不剩。

恃住人多，可以來兩隻烤鴨，分別是原味的，以及古琴酒糟烤鴨。兩者同是會片成淨皮，及連皮帶肉。看師傅以純熟的手法，三幾下手勢便片成靚靚仔仔的出來。片鴨其實有講究，一只鴨應片108刀，並不是亂來的。

先吃淨片，脆卜卜的，醮上砂糖後又頓時變成入口溶化。再來以嬷嬷皮包著鴨皮鴨肉，伴青瓜及京蔥，加鴨醬的傳統的吃法，個人頗欣賞這兒的嬤嬤皮，既薄且柔軟，令成件事更上一層樓。原味與酒糟的其實味道差不多，但後者香氣是明顯的突出很多。

繼而是另一味我喜歡的菜色，蜜汁火方。火腿用上靚既部位，入口鬆化唔會死硬，配合蜜汁就是好，要挑剔的是火腿咸香味未夠出眾。

要更正，我們呢班癲人不是吃了兩隻鴨，係三隻才對，因為還來了一隻八寶鴨。店員讓大家睇完鴨既全相後，便將之支解。

糯米飯是很充足，但感覺上，其他材料未算很豐富，但味道正常。

吃罷那麼多邪惡的東西，有必要來碟菜蔬去平衡下，火腿津白是小數我喜歡的蔬菜類別，但這個火腿可以來得更上乘。

開洋蔥油拌麵，份量比預期的多，麵質是傾向太腍身，喜歡吃軟腍麵條的朋友或會中意。

最後以小籠包作結，飽得連甜品亦吃不下。

餐廳資料:

古琴雅苑

灣仔皇后大道東202號QRE Plaza 19樓

23510528