海外篇：Sra Bua by Kiin Kiin - 有諗頭

食物：$$$$

環境：$$$$

服務：$$$$

是的，根據筆者既習慣，去到曼谷，即使行程再緊湊也好，一餐Fine Dining是必要的。

基本上，整個行程都無咩點計劃，行到邊食到邊，不過Fine Dining既呢餐，就做了些少功課，始終要預先訂座嘛。

高級餐廳，曼谷當然大把選擇，享負盛名的Nahm與Gaggan早在考慮之列，也曾研究過Bo Lan和Bunker，不過最終還是挑了這裡。

點解會揀呢間？隨心而已，我識條鐵咩！

環境真的好，而原來Sra Bua既泰文是蓮花的意思，所以餐廳內設有蓮花池來切合主題。

    

點好餐後，奉來的Welcome Food乃一件小小的腰果酥，口感有少許似兒時吃的水泡餅般鬆脆，有黑芝麻的香，與芥末忌廉來得合拍。另一款則是炸蓮藕片，薄薄的而又香脆不油，跟我手上的香茅茶就最適合不過。

點了兩客午餐，大家分吃。頭盤之一是青瓜與和牛的組合，青瓜冰鎮過，刨成薄片捲起，與切粒的A5和牛擺得靚靚仔仔，店員按客人可接受的辣度去堂弄層次豐富的醬汁。以爽脆的青瓜片包裹著沾了汁醬的和牛粒，好睇又好食。

另一款前菜是我揀的，香煎北海道帶子，賣相有如藝術品般美。帶子煎至兩邊香脆，中芯保持鮮嫩，火侯拿捏精準。醬汁也是下了心思，以南薑、羅望子及南瓜茸打成的小圓點，加上酸酸甜甜的汁料，醒胃之傑作。

其中的主菜，係椰奶鵪鶉。外觀平平無奇，但我不是為影相呃Like，美味才是最緊要。鵪鶉的外皮脆得像薯片，肉質嫩滑，滲出椰奶香，好吃。跟餐會附上白飯，此米本身已好吃，配埋椰汁就輕易可以清掉一碗。

作為正義閎朋友，硩要殲消邪惡既主食，五香組燒五花腩是也。可惜，五花肉未致入口即化，紅燒汁可更醇厚，邪惡程度唔算高，但欣賞廚子將豬皮炸脆，捲成條狀，咬落卜卜脆，總算挽回些分數。

引頸以待的甜點是香蕉蛋糕伴海鹽雪糕，咸味的雪糕更能帶出層次，與香蕉蛋糕很夾，比起另一款斑蘭口味的雪糕，更勝一籌。

椰絲、花生及朱古力的Petit Fours，伴咖啡本是一流，可惜我手上的拿鐵，卻不太對我口胃。

還要一讚，服務是十分到位。

餐廳資料:

Sra Bua by Kiin Kiin

991 Rama 1 Road, Bangkok, Thailand
66 (0) 2 162 9000