凱悅軒 - 來簡約地愛多38年~

食物：$$$$

環境：$$$$

服務：$$$$

某程度上，我都可以稱得上是尖沙咀凱悅酒店的熟客，不論是家庭聚會，抑或是應酬飯局，凱悅軒也會在選擇之列，Buffet就更加唔使講，大人小朋友都喜歡。

再一次在踏足中菜廳凱悅軒，為的是品嚐總廚盧貴溪師傅入行三十八周年的精彩美饌。將多年來最受歡迎最撚手既菜色蒐集在這全新菜單之內，真係好難會唔好食囉～

許多時食中菜，又要遷就呢個又要夾嗰個口味，點菜都幾頭痕。呢個可以位上的安排，夠晒個人化，絕對是德政。

    

前菜六選一，我們五人分別要上不同的頭盤，五款大家些牙食，好不開心。先嚐爽脆的話梅青瓜，咸咸酸酸夠醒胃，是最好的熱身；茄子蒸得軟腍，醬油有助提升層次；酒糟鴨肉質鬆化也入味，酒香若能強一點仲好；叉燒是這兒的名物，其實不用多介紹，也可知會是鬆化有蜜香；冰鎮鹵水九孔鮑之前也試過，個子不少的南非鮑，一如以往的軟腍又入味。基本上，全部俱合心。

燉湯是二選一，四寶燉萬壽果與花膠北菇燉菜膽，前者的清甜令人難以忘懷，但今天的我卻想吃花膠，所以揀來後者。大大塊的花膠口感好，花菇肉厚但腍身，湯頭清甜到不得了，整碗清掉確沒難度。

主菜有十多款選擇之多，機會成本好鬼高，即使五個人叫不同的，都試唔到佢一半呀！逐一講下，乾逼粉絲蝦球煲，蝦球咩事咁巨大，咬落彈牙爽口，墊底的粉絲當然無人會走寶。

接著是三杯銀鱈魚，鱈魚意料中的嫩滑之餘，亦十分香口，記緊要連同蔥段及蒜子吃，風味更勝一籌。

XO醬露筍炒帶子係我揀既，帶子又係巨無霸級數，但火候恰好，十分鮮嫩，以XO醬來炒自然香口，少許辣勁更惹味。咁大隻帶子，肯定要用粗身的露筍才襯我起它。

再有黑魚子炒芙蓉蟹，蛋白實在嫩得很，頂頭簡單的配上咸鮮的黑魚子，已成為精彩既一道菜。

最後一道主菜係豉油皇玉簪香煎斑球，用的是東星斑，盡顯矜貴。魚肉煎得香而不會散，以幼身露筍作玉簪，乃花功夫之作。不忘要配汁醬，當然不是一般豉油咁簡單。

蔬菜有叫清炒的，有叫薑汁的，更有金銀蛋，最喜歡不單是菜的嫩，咸蛋黃也處理至長型，吃時不易散，很好。

朋友的金瑤海鮮炒紅糙米飯幾吸引，但我必要一嚐龍蝦帶子貴妃泡飯，鮮甜的湯式，除了龍蝦肉與帶子粒外，脆米更令整個泡飯生色不少，屬必吃項目。

甜品之酥皮流心盞，集合菠蘿包皮，湯丸及撻皮於一身，好吃程度非筆墨可形容。

不久之將來，我又會來Hyatt，是久違了的Hugo’s呀～

餐廳資料:

凱悅軒

尖沙咀河內道18號香港尖沙咀凱悅酒店3樓

37217788