明發茶室 - 敗在豬油渣

食物：$$$

環境：$$$

服務：$$$

在深水埗巷仔經營多年的明發小食，近月作出了優化，並先後在深水埗和長沙灣開設了店，簡單直接取名為明發茶室，街坊就唔會唔知定摸錯地方。

第一時間已幫襯過本店，但作為長記仔既筆者，怎樣也要到一到長沙灣店拜訪下。

當然不會期望店子會有什麼特色豪裝，至少乾乾淨淨，企企理理，比起當年還是「小食」的日子，已是大躍進。

   

 

近年已不再食魚翅既本人，碗仔翅仍是抗拒不了，先來碗久違了的碗仔翅，兩溝。湯頭夠熱，濃稠得宜，味道也好，魚肉口感彈牙，童年味道跑出來，有番咁上下年紀既朋友會知我講乜。

醬爆肉上海麵是這裡的招牌之一，麵條其實沒什麼特別，醬爆肉卻是精華所在，非常惹味，而且鬆化，個人認為是十分出色，我想將之配白飯，或者更精彩，下次來一於試試。

說碗仔翅很有童年味道，豬油渣麵照理也不會輸蝕，可惜呢度既豬油渣，並沒炸香把油迫出來，只是一粒又一粒的肥豬肉，吃得滿口肥羔，完全不是那回事，即使你放入菜圃，也無補於事。

餃子太誘人，嚐了一隻才驚覺忘記拍照，快快趣拿手機隨便影張便算。餃子煎得香脆，又不致太油膩，椰菜與韭菜餡之間，我會較欣賞後者，始終是香口一點。

一份豬油渣，拖垮了整個品牌的印象，可惜！

餐廳資料:
明發茶室
長沙灣元州街324號地舖