澐 - 遠在天邊的晚餐

食物：$$$1/2
環境：$$$$
服務：$$$$ 

孤漏寡聞既我，從來未入過去博覽館。

聽過好幾個朋友介紹呢間Nuva，趁假期就同屋企人去見識下，順便當做節。

如果係食晚飯既話，建議大家盡可能早少少入去，睇下個咸蛋黃落下既magic moment，真係好靚。天黑齊之後，就完全無景可言。

費事傷腦筋，直接要個5 Course的晚餐。打頭炮既係個湯羹，蟹肉燕窩羹，女士們見到一定會好歡喜。

都幾足料既，尤其蟹肉成份真的多，頂頭有些少火腿茸來帶出味道，算是唔錯既開端。

之後的翡翠柚子蜜脆蝦球，大大粒橙色波波似龍珠，儲齊七粒係咪可以達成願望? 大啖咬落去，外皮脆，蝦肉爽，但就無乜味道，要靠外來既汁醬來作調味。

跟住有花菇海參煲，花菇勝在厚身，海參的口感也不俗，總覺得呢道菜好有過節Feel。

叉燒飯就叉燒飯喇，加個荷包蛋，黯咩然銷咩魂飯呀！呢種既Title inflation，大家都受落。淋上自家調製既豉油，可以起動。蛋汁與味帶微甜的豉油滲進米飯之中，已經好食。再咬一口鬆既叉燒，雖未去到感動既級別，但我都滿意。

甜品的桂香水中花，豆腐像花一樣在薑水中蕩漾，材料唔值得幾多錢，就值錢在師傅的刀功。再加上乾冰帶出來的煙冒效果，影相打卡一流。旁邊的糕點都清新可口既。

食埋個清甜的水果拼盤，不枉我山長水遠入來食一餐。

餐廳資料:
澐
赤鱲角香港國際機場亞洲國際博覽館2樓
36068818