名棧拉麵小籠包 - 小店，止止癮

食物：$$$

環境：$$$1/2

服務：$$$1/2

小籠包癮起，唔理好醜，但求就手，隨便見到有滬菜食便衝入去，懶理是大館子，抑或是街坊小店。

唔好誤會，我意思唔係話呢間名棧一文不值，只是我路經見到，沒有加以考究佢風評如何，便走進去，找個位置坐下。

是在荃昌的小店子，地方狹小，難免要背貼背的坐著，若追求坐得舒適的朋友，呢度唔岩你。

  

除小籠包外，我都好中意擔擔麵，所以二話不說先整碗菜肉雲吞擔擔麵。湯底微辣，帶點點麻醬香，雖不是頂級，合格有餘，麵條亦爽口。雲吞皮頗滑，沒有太多挑剔。

接著試了幾款點心，小籠包固然是主角。一籠四隻，包得算靚仔，收入位沒有很厚很硬，夾起全部都沒有穿，過關！湯汁是有一點，但是，肉餡算不上鮮，相信不是新鮮豬肉。不過呢個水準，對得住個價錢。

紅油抄手就麻麻，可能是放了一段時間，皮是偏硬，尤其是『金魚尾』的位置，扣了唔少分數。

最後的鮮肉鍋貼，形狀幾靚，外皮不黏牙，底部也煎得香脆，吞下兩隻無難度。

豆漿是來貨，勝在夠冰凍。

店子小小，但錯單情況頗嚴重，或許是年長店員不太懂得用這POS~

餐廳資料:
名棧拉麵小籠包
荃灣荃昌中心昌寧大廈1樓53-54號舖
24998383