北河同行 - 心思大於一切

食物：$$$

環境：$$$1/2

服務：$$$1/2

深水埗明哥，幫助基層市民不遺餘力，派飯派到蜚聲國際，若然你唔識佢，一係你不吃人間煙火，一係你長居外地，我諗唔到有第三個原因。

舊舖業主，以為明哥出左名賺唔少，大幅加租，還幸同區仍有良心業主，將舖位廉價租俾明哥，促成新舖北河同行。

我不打算在此詳述明哥的豐功偉績，想知既話，自己Google下，大把資料。

舊店我嚐過一次，新店倒是沒有試過，趁要去北河街運動場，因利成便去醫下肚。

    

舉目四望，食客不盡是老人家，仲有唔少像我等的中佬，甚至年輕人。

餐牌設計當然不會太精美，DIY製作，貼上蔡瀾先生題字的北河同行Label，實用為主。

食物選擇其實唔算少，一般茶記有供應的碟頭飯麵，這裡也可以找得到。

要個午餐，豉椒雞球飯。大概是為照顧老人家，米飯是煲得較爛的，雞球雖大大件，似雞塊多一點，仍是腍得幾近不須咀嚼，即便是青椒，亦沒有太爽脆的口感。呢碟飯，並不是天下間之美食，但心思大於一切。

凍奶茶反而唔錯，夠香夠滑，勝過不少茶餐廳。

連凍飲埋單三十，不是良心價，是什麼？

看見明哥全程在忙，近兩點鐘才出門外食口煙，三幾分鐘又回到工作崗位。

餐廳資料:

北河同行

深水埗大南街278號地下