伊賀日本燒肉料理 - 任砌，總有市場

食物：$$$

環境：$$$

服務：$$$

本身對日式燒肉放題無甚興趣，總覺是年輕人玩意的填肚貨色，不過上次在某地方嚐過唔錯的出品後，自此改觀，也不介意去其他的日本燒肉放題店試試，了解下市面的水準大概去到邊。

120分鐘任點任食，Are you ready？

坐低無耐，還未點餐，店員先放低一份刺身拼盤，贈送的。對燒肉放題的刺身從不寄予厚望，呢個已算不俗，三文魚、八爪魚、櫻花魷魚與玉子，均比預期中新鮮。

     

邊吃刺身，邊點心水東西。家陣科技發達既年頭，餐廳都與時並進，不再用紙仔劃劃劃，拿起部Pad落柯打，方便快捷省人手。

吃了幾款壽司和軍艦，肯定不能與頂級壽司專門店相比，卻大致可以接受，當中最期待的是三文魚籽軍艦。

沙律不是充滿不同蔬菜的，而是蟹柳絲、青瓜絲、蟹籽及沙律醬的醒胃之作，滿載兒時回憶，小時候認知的沙律本就是這樣。

幾款炸物，不管是炸雙皮奶，抑或是娘惹山藥，甚至是榴槤炸彈，皆炸得香口、乾身而不油膩。個人最喜歡炸雙皮奶。炸榴槤其實唔差，但冷熱的對比若能更加明顯，會仲好。

講左咁耐，係時候有燒既東西，不同部位的牛肉，如牛小排、漬壺牛、伊賀一口牛，或者係朋友燒既手勢好，可以收貨有餘，只是牛舌稍為韌了點。

海鮮有驚喜，大蝦口感彈牙，帆立貝個子雖小卻味鮮，小蟶子與白蜆來得鮮甜，後兩者更加要「安哥」。其他的肉類，五花腩與豬腸，可以更邪惡些。

雖是任擦，都唔須要搏老命既。再燒些蔬菜，如茄子及秋葵等便可，個人幾中意食秋葵的。還有，燒菠蘿是必吃了吧，將水果的糖份迫出，香甜多汁可口。

在電子餐牌上找來找去也發現不了甜品一欄，原來結尾會送上每人一客雪糕，是Movenpick的出品，巧克力、草莓和雲尼拿口味，大家猜我會怎樣挑？

餐廳資料:

伊賀日本燒肉料理

尖沙咀赫德道4號The Hart 3樓

28871028