唐宮小聚 - 週末宜小聚

食物：$$$1/2

環境：$$$$

服務：$$$$

睇完本年度我最欣賞既電影後，時間已不早，大家肚子都在打豉投訴，要快快找地方醫肚。

照例，搵食是由我來話事，忽然想吃些「公仔」點心，相信Yum Cha是沒位的了，所以我決定直接去唐宮小聚。

近兩點半到來，唔使等位，証明我無決定錯。一定係，除非唔係。

猶記得中環的唐宮小聚，店子中間有張乒乓波枱作裝飾，尖咀呢間分店就沒有了，只剩下一些乒乓波板和波。

 　　　

上菜速度很快，一下子滿桌均是食物，由冷盤開始說起。雞絲粉皮，粉皮幾滑，麻醬夠多夠醒胃。除了雞絲以外，廚子更加入了不少蟲草花，一來顏色配搭更漂亮，亦豐富了層次感。

其次是小聚拼盤，可選三款小食，江南千張是腐皮卷，起初仲以為係千葉豆腐之類的東西。上海燻魚無滑又入味，但可以來得更香。冰鎮秋葵是朋友之選，爽脆的口感我也喜歡。

以上兩款皆合格，可是醉雞就不行了。雖有點酒香，肉質卻是死實實的，就算是髀位都係咁，太遜色了。

白玉王鴿正在做優惠，於是點了兩隻。色澤靚，肉質嫩滑而有汁，不要太斯文，拿上手起才過癮。店方會附上膠手套，讓大家吃得更方便。

又柯打了兩款包點，紫蓉豬豬無錯就是豬頭炳造型，可唔可愛見仁見智，但包身總算軟熟，紫薯香甜可口，無須放上鳩劣飯堂示眾。

黑金流沙，外表真正型格，但並不是虛有其表，即使放了好一陣子，咬開仍是流心，蛋黃香濃熱度足，高水準之作。

脆蝦雲吞也有著新派的造型，餡料足漲卜卜之餘，亦做成像開花般，好睇又好食。

最後的腐乳蟶子，這個組合我也是首次見識，小蟶子火候控制好，爽口而不韌，想不到跟腐乳會是這麼合拍。

時間太緊迫，甜品要留待下次了，可惜！

餐廳資料:

唐宮小聚

尖沙咀廣東道30號新港中心3樓303號舖

31681362