國金軒 - 美酒佳餚，跳脫音樂

食物：$$$$
環境：$$$$
服務：$$$$

做鴨 (我指北京烤鴨，不是男妓！)，幾乎是必勝的項目，你睇Mott32、美中鴨子、大都烤鴨等等，無咩邊間會衰。

做得出色的烤鴨，美麗華國金軒必然是一例，早在五年多前，筆者已經存博文中大讚過。

好東西梗係要一吃再吃啦，最近佢推出左紅酒配烤鴨的套餐，逢星期二供應，呢個仲唔係最佳藉口俾我重溫美味?

平易近人，味帶果香的Bourgogne Rouge Cuvee Saint Vincent，是我們的選擇，大家「奸悲」！

 

多汁

服務生奉上的悅口小吃，是胡麻醬車厘茄，不用多講，都會知道是清新開胃。
 

打開胃口

前菜是鮑魚與鴨舌，醬皇鴨舌入晒味，愈「選」愈滋味，凍鮑魚保持一定咬口，配以柚子及椒粒，完全打開了胃口。
 

有靚湯飲

套餐就梗唔會冇湯品，是晚的安排，係粉葛煲豬骨湯。單憑其香氣，與及湯料，已知會是高水準。呷幾口，也能確認我的判斷，是絲毫無誤。其實，來過咁多次，從沒懷疑過這裡的水平。

主角

 

喝清湯後，戲玉的片皮鴨要登場。鴨皮滿有光澤，連皮帶肉的片出來，好吸引。就是包鴨的麼麼皮，也有三款口味，分別是原味、甘筍和菠菜。脆香的鴨，夾著京蔥、青瓜等配角，沾上鴨醬，整件放入口，豪邁，一等一的享受。
 

氣勢非凡

再來的多寶魚，魚骨炸至香脆透徹，造型似隻船。起了肉，以豉椒去炒球，口感好，又惹味，不錯。

一流!

 

食肉獸既我，除了片皮鴨外，最期待的，便是紅酒牛尾了。奉上來時，已是香氣四溢，牛尾燴得超級的腍，膠質豐盈，是近年吃過最出色的牛尾了。
 

二食

片皮鴨，梗有兩食，第二食係銀芽炒鴨絲，味有點濃，肉有點韌，加上此時已飽了大半，淺嚐便可。
 

平衡下

嚐過眾多濃味的東西，來一客浸菜苗，去中和番下，實在是好。
 

大滿足

以鬆脆的合桃酥，和特色的甘露酥作結，還欣賞到跳脫的音樂。這個晚上，怎會不滿足呢?

餐廳資料:
國金軒
尖沙咀彌敦道118號The Mira 3樓
2315 5222