Marriott Cafe - 以龍蝦和花膠作賣點的自助餐

食物：$$$$

環境：$$$$

服務：$$$1/2

雖然身體不適，但與他吃飯的機會將愈來愈少，即使再辛苦也一定會出席。況且之前幾次訂呢度既自助餐都唔成功，難得一次訂到位，貪食既我又怎會輕言放棄。

一去到已經被其海鮮吸引住，第一輪諗都唔使諗，先掃佢既海鮮。龍蝦、生蠔、蟹、青口、翡翠螺，通通唔放過，若不是敏感，蝦亦唔會走得甩。

剛克服了對龍蝦的敏感，即時整番件。頗大的龍蝦開邊，很多肉，味道鮮美，惟稍嫌肉質韌了一點，其實也算不錯；生蠔是澳洲產地，比較細隻，也相對淡口，總的感覺仍是新鮮，但個人還是喜歡法國蠔多一點；翡翠螺最有驚喜，很鮮甜，有咬口；青口幾大隻，亦算爽口。

壽司和三文魚是我第二輪主攻的食物。拿了腐皮卷、加州卷、吞拿魚卷等，全都是新鮮，飯也握得不錯；三文魚刺身相對遜色，淡口無味，反而旁邊的煙三文魚更為出色。

兩款芝士，一軟一硬身，各試了一點。兩者都不是太濃味的，但在質感上我較喜歡柔軟和creamy的Brie，用來夾餅乾食也不錯的。意大利火腿咸香味足，有水準；紅椒和黃椒均是爽甜，我也欣賞。

湯，我選取了西湯，係粟米湯。志不在多喝，只是飲些少暖下胃。粟米粒多，又香濃，最優勝的地方還是溫度十足。

熱盤有兩樣食物是其他地方難找到的，一是北京填鴨，另一是草菇炆花膠。北京填鴨油香不夠，皮也略嫌太厚；花膠雖不是厚身，卻幾入味，亦唔會腥，做得幾好。

其他的熱盤包括蒸魚、鴨胸、焗魚柳等，都可以收貨。而每次食buffet，我一定要食燒牛肉。這裡的牛肉味重，肉質嫩滑，沒有渣，加上Gravy食真是無法抗拒。咸點差不多了，輪到甜品時間。款式也不少，逐一介紹下。

芝士蛋糕，芝士味幾重，而質感則不夠滑溜；Tiramisu酒香味差了些少；朱古力慕思夠香夠濃，抵讚；草莓千層酥，只得酥皮脆，吉士未如理想；菠蘿果凍，生果鮮甜，也很醒胃；Apple Crumble Tart，皮脆果肉香；最後的蘋果焗布甸，很好！

也有雪糕和師傅即場製的Pancake，但狀態不佳，真的無法再吃。

Waitperson的服務殷勤，值得一讚。反而企Counter的師傅就... Anyway，是很滿足的一晚，很開心。

餐廳資料:

Marriot Cafe

金鐘道88號太古廣場香港JW萬豪酒店5樓

2841 3906