Balcony - 歐陸半自助餐

食物：$$$1/2

環境：$$$1/2

服務：$$$$

我經常會幫襯悅來酒店的餐廳，不過十居其九都是去中菜廳殷悅，貪佢食物精緻、美味、服務也殷勤。最近連續好多日都係食中菜，有時甚至一日食幾餐中菜都有之，自己都感到有些厭倦，係時候轉一轉口味來其歐陸餐廳吃一頓半自助午餐。

平日的中午，客人稀少，可以很寧靜舒適地享受午餐，實是難得。先睇主菜的餐牌，有五款選擇，牛雞魚海鮮及素食等都有，幾周全的。考慮一會，決定要煎 『立魚』配鵝肝，對方就要青口帶子意大利麵，Order完主菜，出去看有咩頭盤及甜品食。

沙律、意大利雜肉火腿、水牛芝士配蕃茄青瓜等頭盤，每樣取了一點回來。其雜沙律，是黃椒撈埋火腿絲，清甜爽口又開胃； 幾款的意大利火腿都係風乾感覺不足，吃不出咸香味道；水牛芝士煙韌，如可香一點就好。

喝了半碗南瓜忌廉湯，溫度足，不會溫溫吞吞咁。南瓜味道香濃，是幾好的暖胃飲料。

主菜方面，我的『立魚』最值得讚。輕煎過的『立魚』，魚皮脆口，肉質嫩滑又有鮮味，當然亦是啖啖肉，完全符合我既要求。鵝肝屬入口溶化，且香，但稍嫌太咸，有些少瑕疵。至於伴碟的荷蘭豆和茄子都是爽口、鮮甜，毫不馬虎。

也試了一點青口帶子意大利麵，麵質中規中矩，算不上彈牙，當然亦未至於太差。帶子又是經輕煎，很香口的。即使邊位亦不過韌，中間肉的位置更是甜美，總的說可以收貨了。

終於到期待已久的甜品上場，先試四小碟，即小布丁、黑白朱古力配、生果慕絲和栗子撻。四款之中，栗子撻及黑白朱古力配我較喜歡。栗子味清香，頂部又一粒香脆的鮮栗子，撻皮亦是十分鬆化； 黑白朱古力配，其實係濃濃的黑朱古力，上面蓋上一小片白朱古力作點綴，由於味道特香特濃，所以合我心水，不過一般人可能會嫌太甜太漏。

蛋糕有四款，讓我逐一介紹。藍霉芝士蛋糕，面頭的藍霉幾新鮮，可惜芝士味不香，也不夠滑溜；草霉餡餅的草莓醬太甜了，連我都唔係太頂得順；另有一款藍霉蛋糕，是沒有鮮藍霉肉的，不過味道不太突出；最後一款我都唔知係咩名堂，感覺有如是麥包，但就做成蛋糕樣子，這反而是最好味的。

其餘的曲奇餅、生果等普通貨色，不在此長氣了。

整個場只有兩個服務員，但服務幾殷勤，值得嘉許。有VIP卡，二人行收一人價錢，埋單兩舊水，非常抵食。

餐廳資料:

Balcony

荃灣荃華街3號悅來酒店4樓

2409 3226