2022年10月3日 星期一

肉料理廣 - 天堂



食物:$$$$
環境:$$$$
服務:$$$$ 

即將赴英過新生活的朋友竟然話從未係香港食過日本燒肉,識做,嗱嗱聲搞番局。

因為之後去南華會打波,所以就近近地係銅鑼灣食,我諗起肉料理廣。

四條友,叫個A5飛驒牛二人餐,再散叫啲其他,大家開心些牙。

漬蘿蔔、茶碗蒸等唔講咁多,食些少沙律菜打開胃口,就入正題。

二人餐有個和牛壽司,分別係赤身,與及霜降。兩者分別其實唔太大,同埋都好淡口,需要點豉油吃。

熱身完畢,可以開始燒,就由海鮮拼盤講起。兩條幼幼既鱈場蟹腳唔多夠喉,魷魚火候唔難控制,只要唔好燒到過晒火,水準可以預期。

帆立貝幾新鮮,燒既時候仲會郁,唔好燒得太老,裙邊爽脆,入口鮮嫩,加埋牛油,唔錯的。反而兩隻虎蝦沒想像中的好,搞到我連蝦頭既羔都唔敢食。

幾喜歡呢度既肉眼,有小小厚度,唔需要燒得太熟,入口嫩腍,脂香十足,那股油香在口腔內徘徊,呢啲係咪幸福既感覺呀?

食燒肉,配白飯最好,根本無必要加錢去轉咩石鍋飯。

兩人餐既肉食跟住出場,十六片牛肉齊齊整整咁排好,有清晰既標示,可清楚自己食緊乜。唔逐件介紹了,其實全部都滿意,而赤身與霜降之間,後者的西冷、肉眼芯和友三角會比較合我心水,畢竟我係喜歡軟腍,入口融化的質感。但其實A5和牛,就算是赤身,都瘦極有限。

食左咁多肉,其實都好飽,再嘆埋跟餐既豆腐雪糕,大滿足。

好在主角都滿意呢一餐。

臨走前,把握機會食多一、兩餐吧!


餐廳資料:
肉料理廣
銅鑼灣渣甸街50號渣甸中心2樓
28829877

4 則留言: