Bistro on the Mile - 食鮑鮑食飽

食物：$$$1/2

環境：$$$1/2

服務：$$$$

如果話狂吞飽魚食到飽，你可能會覺得我好沙塵、懶巴閉，其實我只係吃了一餐Buffet而已。

金域假日酒店的Bistro on the Mile，今期主題係「鮑魚滙聚 · 鮮味之最」，由冷盤、湯品，以致熱葷，處處鮑魚蹤影。因此，食鮑鮑食飽，唔係咩一回事。

    

話雖是鮑魚做主角，亦可來點凍海鮮打開胃口，藍青口、翡翠螺、長腳蟹、凍蝦、小龍蝦，乜乜乜，向來是受大眾歡迎的項目，我還是喜歡漲卜卜的生蠔，唔理三七廿一，吞下三隻才算。

有鮑魚入容的冷盤，不一定會被搶到亂晒龍，如鮑魚海鮮沙律白酒啫喱杯，以及鮑魚配紅酒梨串，均是以小杯裝，精美又唔會被搞到一糊塗。個人覺得前者幾清爽。

仲有好多沙律，都係加入了鮑魚成份，如什菌沙律、韓式冷麵沙律、海蜇沙律等等，但我仍要留力。

惠顧此主題的自助餐，每人有一盅佛跳牆，原隻鮑魚不在話下，還有海參、花膠等矜貴食材，喝一口，清甜入心頭。

好了，幾輪衝鋒後，要吃熱食了，由中式開始。蒸九孔鮑，手快有手慢無，幸得友人幫我多取一隻回來。

鮑魚配鴨腳花生，誠然，個人更喜歡軟腍而不散的鴨腳。另外，燴伊麵都加入了鮑魚及冬菇絲，貫徹主題。其他的蒸魚、西蘭花炒蝦仁等，每樣吃一點，足以飽到上心口。

相比起來，個人更喜歡西日式的鮑魚系列，鮑魚白菌酥盒鬆脆，不過幾飽肚，一隻試下味道便好。煎鮑魚蟹餅，本已精彩，重點是配埋個日本芥末蛋黃醬，教人停不了口，點都要Encore多一件才收手。

幾件壽司後，便可以吃甜點，鮑魚壽司是重點。

甜品種類繁多，當中必吃的，要數到鬼佬油炸鬼。另外葡撻、提拉米蘇、草莓芝士蛋糕、豆腐花、麵包布丁、HD雪糕等等，唔飽就有鬼。

所有銀行既白金卡都有75折，家陣所謂白金卡，牛頭角順嫂都有啦，即係等於五百有找便可食鮑魚食到飽。

餐廳資料:

Bistro on the Mile

尖沙咀彌敦道50號金域假日酒店1樓

23151118