Fabrice 嚐味: 劉裕發茶莊 - 上了癮，番唔到轉頭～

我心感興奮，個個歡樂笑嘻嘻；喝得心花放，在這美麗園地……

我哋唔係去左海浪公園，只係來到樂富既劉裕發茶莊，跟幾位朋友一齊學習品茗。以往我一直覺得，學習品茗，是這麼近，那麼遠的一回事。

大家有飲茶既習慣嗎(唔係去茶樓飲茶嗰隻喎)？筆者小時候，「阿麻」是有沖茶的，不過無得選擇，獨沽一味喝六安。個人又幾鍾意六香既味道的。

自從「阿麻」走了，也甚少再飲茶了。若你問我喜唔喜歡飲茶，我仍會答喜歡。只是懶，所以沒有自己沖茶泡茶，當然也沒有去研究茶葉、學習品茗。我想，好多香港人其實也跟我一樣，喜歡，卻從無研究。

一係唔學，要學梗係搵間好既喇，否則學壞師仲大鑊。呢間劉裕發茶莊係老字號，年紀比我還要大得多，一定無衰。

是次之課堂，由第三代傳人亦老師親自教授，大家除了學習到許多茶葉既知識外，更有機會試飲幾款靚茶葉，配埋月餅，發達啦～

聽完老師講解了基本的資料，又學了怎樣揸茶盅及茶杯，可以開始試第一款茶葉，岩茶。或許各位都知道，武夷岩茶是中國十大名茶之一，產於福建省北部的武夷山地區，屬烏龍茶類。

是日品嚐的老欉水仙，係2017的岩茶，採自武夷山三仰峰50年以上樹齡的老欉。因老欉的數目少，收成理想既更少，所以係貴嘢，價值比大家成日聽到既大紅袍仲要高咁話。這款茶色偏淺，但飲落很醇，但點回甘，不懂品茶的我們起初飲唔到太多層次，幾老師指點後，確又真係喝得出微甜及咸，總之是令人很舒服。

好了，再試另一款茶，係工夫茶，即我哋所認知既潮汕工夫茶，去食潮州菜頭尾會飲個小杯。我知道，此茶是以鐵觀音為主，但原來烘焙之後，須要儲存至少一年，待火味退卻後才會沖泡飲用，叫「退火」。

今次我們飲到既工夫茶王，更是極上等的鐵觀音，茶葉靚，再經上5年的退火。

飲工夫茶用小杯，這個我是知道的。原來用作沖泡的茶壺也有講究，Size同樣是細的，更要以行內人說既「韓信點兵」方式去斟，並不是一下子便倒入小杯，這樣更看得出茶色的變化。的確，呢杯茶並不是一味得個苦，而是極醇後有爆發性既回甘，配上薑汁月餅真係一流。

再來就是大家都肯定聽過飲過的普洱了，此茶有生與熟之分，主要分別是經烘焙。聽完資料，事不宜遲，先試7年既宮廷普洱，係熟茶。一般茶葉第一泡會唔要，第二泡才飲。原來新普洱係會第三泡味才品嚐，陳年的生普洱更要再沖一泡才喝，味才會出。味帶酴甜，食完月餅飲一杯，消滯解膩，當然此質素是比酒樓甚至樓店的茶葉要好飲得多。