2021年1月7日 星期四

圍威喂 - 從荔枝角走到荃灣

 


食物:$$$$
環境:$$$$
服務:$$$$ 

荃灣其中一間我真心會回頭的餐廳,要數到圍威喂~

早在幾年前,筆者已經偶爾幫襯荔枝角的總店,各式東南亞美食做得有板有眼,同埋餐廳當年有個主題,就係打小人。

呢兩年,你估我會想打邊個?

圍威喂近月在荃灣廣場開分店,新張大酬賓,星期一至五午市免加一,兼有八五折,所以我已惠顧了幾遍。

首次到訪時,巧遇食友車爸媽,當時限聚令未有咁嚴緊,三條友仲可以坐埋一枱,試左唔少嘢食,有飯有麵有小吃,大家印象都好正面,車媽媽更笑說其蝦麵係佢係本地嚐過最出色的。

這次與朋友再訪,分別選上了炒粿條,與及海南雞飯,大家分享。炒粿條先上,幾隻蝦個子巨大又爽口,河粉炒得好香亦夠鑊氣,不過我總覺得似港式風味,多於星馬口味。然而單計味道,我是收貨有餘。

海南雞已褪骨,雞皮爽,肉質十分嫩滑,三色醬之中,我從來只鍾情於黑漆漆的甜醬油,沾海南雞同吃,認真不俗。再者,油飯同樣充滿香氣,比起現今很多所謂海南雞專門店,水準有過之而無不及。

雞套餐會跟上油菜,簡單的一小碟西生菜,配上蠔油,平衡一下心理。



可惜荃灣店仍未有意式咖啡供應,還記得總店的拿鐵,是挺合我心的。

希望下次到來,可嚐到合意的拿鐵,或者小白。


餐廳資料:
圍威喂
荃灣大壩街4-30號荃灣廣場4樓432號舖
23501128

4 則留言: