2021年1月8日 星期五

鮨白鳥 - 師傅,我想Encore呀!



食物:$$$$
環境:$$$$
服務:$$$$ 

雖然筆者唔會咁天真,認為踏入二零二一年,什麼都會好起來。

不過,我都會去吃餐好的,算是新一年有個好開始吧,說到底我也是個老饕。

好耐好耐沒吃日本料理,壽司癮餓得太久,在無訂枱的情況下,去到Sushi Hakucho碰一碰運氣。

店員話:『壽司吧枱位已訂滿,只剩一張卡座,有冇問題?

梗係照殺~

午餐有唔少選擇,費事傷腦筋,我倆都決定要Omakase

打頭陣的茶碗蒸,感覺有點水汪汪,勝在溫度足,雞蛋蒸得滑溜,還混入了不少帆立貝在內,味道不俗。

之後的兩小鉢,分別係八爪魚,與及粒貝。前者唔會好韌,喜歡佢加入了石榴籽,令成件事更有層次。後者同樣爽脆而不韌,廚子灑了點點檸檬汁,更能引出粒貝的味道。

接著來就是壽司環節,頭三件壽司有左口魚、針魚,同埋油甘。飯糰握得唔錯,師傅將一片紫蘇葉加入爽身的左口魚壽司之內,其獨特的個性令整體味道更清新。針魚與油甘也鮮爽,恰如其分。

轉眼間,第二碟壽司又送上,內容係牡丹蝦、赤睦,以及赤身。撞鬼,竟然食晒才發覺忘記影相,真係老人痴呆,唯有借好友那碟來拍照 (但都已經食左件牡丹蝦)。廚子把蝦羔放在爽甜味鮮的牡丹蝦之上,再以火炙過,吃起來自然多一份迷人香氣,真心推介。赤睦的油香及赤身的爽甜也能討我歡心。

再來就是入口溶化的拖羅和鮮味爆發的馬糞海膽壽司,以往吞下咁多件壽司肯定已經飽飽,或者呢度既出品水準高,我反而有點唔夠喉。

味噌湯夠味而不搶喉,欣賞佢放入唔少蔥花在內,合我心。

甜品是簡單的兩粒蕨餅,個人對這款日式甜點其實有保留,然而這兒做到煙韌但不黏牙,好耐沒嚐過如此美味的蕨餅,我甚至想Encore一粒。

套餐沒包咖啡,不打緊,俾個機會我哋有下場,仲好!


餐廳資料:
鮨白鳥
尖沙咀棉登徑8號凱譽地下13號舖
21091155

4 則留言: