食物：$$$$
環境：$$$$
服務：$$$$
年近歲晚，其中一個重要的節目，就是跟大家吃團年飯。
是夜一行九人，來到我一直渴望到訪的君綽軒吃團年飯，搞手仲要已安排好菜單，真係要講一句
Thanks for having me!
二月頭，酒店已換上了新年的佈置，桃花、揮春等統統準備就緒，充滿節日氣氛。
過年飯局的頭盤，並不是乜乜幾小碟，而係非常好意頭的撈起。鮑魚、三文魚、花膠、青瓜、蘿蔔等等切條，仲有合桃和很特別的炸髮菜，很是豐富。
淋上汁醬，大家準備好筷子，便起勢咁將各式各樣食材撈勻，撈得愈高愈好，再加上意頭說話和歡笑聲，呢味餸真的好適合過年食。再講，三文魚質素唔錯，不同食材又帶出不同層次的口感，汁醬帶點點日式芥末的清新氣息，好玩又好食。
藥膳雞煲，端上來時看噴噴，已經深知是好東西。呷一口湯，其香甜味令人陶醉，再加上嫩滑的雞件，食完溫暖飽足。接著來的花尾斑球煲，夠晒厚肉，魚皮爽，一定要連埋大量薑粒同吃，好味。黑椒粉絲大蝦煲，採用了虎蝦，個子自然夠大，加上黑椒的香，十分惹味。墊底的粉絲從來是最佳配角，甚至搶去主角的風頭。
之後是過節過節會吃的蝦子海參柚皮鵝掌煲，好夠體面。海參贏在口感，柚皮沒半點苦澀味，鵝掌大隻又不會散，仲有大隻厚肉的花菇，確是做節必點的菜式。
古法雙冬羊腩煲，服務員拿上桌時，又係香得要命。羊腩皮爽而不韌，肉質嫩口，本身已夠味好食，沾上腐乳，又是另一番滋味。當然，生菜及雙冬都是恰如其分的配角。
鳳凰報喜都是為節日而設的項目，其實即是陳皮脆皮炸子雞，在這地方吃雞，皮脆肉雞是預期之中，用上30年陳皮，其香氣亦令成件事更上層樓。
單尾像蛋包飯的出品，實際上都可說是蛋包飯，只是用上的係糯米，依家中餐的賣相，也要與時並進。
糯米飯軟韌，不黏牙，配以各式腊味、花生及蛋香，再飽也要吃幾口。
甜品環節，就以煎薑汁黑糖年糕和陳皮棗蓉糕應下節，兩者都很出色，尤其是黑糖年糕，煎至香口不黏牙，贏得全場掌聲。
滿足的團年飯，但願大家身體健康，豐衣足食，來年繼續齊齊整整坐埋開懷吃喝~
新年有幾多日放假呀？
回覆刪除