2023年3月20日 星期一

玉庭 - 中式都係師傅話事



食物:$$$$
環境:$$$1/2
服務:$$$1/2 

Omakase並不局限於日本料理,早前已有一批中菜大師加入中式廚師發辦行列,讓大家可以免卻煩惱,嚐到師傅的拿手好菜。

近期試左沙田帝都酒店中菜廳玉庭既中式Omakase,尤師傅使出渾身解數,炮製出一道又一道驚喜菜色。

頭盤大玩乾冰效果,以鮮淮山、鮮百合、紅肉火龍果以及梅子番茄砌成既花仙氣滿滿,淮山及百合不同程度的爽脆,結合梅子番茄之酸甜,成功打開我的胃口。

接下來的乳豬當然也是花過心思,係糯米櫻花蝦千層豬。皮脆肉咸香的豬,伴以糯米和櫻花蝦之餡料,吃起來的確有層次。除了傳統的乳豬醬以外,師傅更加添了黃芥末醬,變化更加大。

吃中菜必定會有湯水,這盅花膠海參灌湯餃,打開盅蓋,香到一個點。內裡既有爽滑的海參,亦有養顏之花膠,與及飽滿足料的海參灌湯餃,點會唔甜丫。

之後是龍蝦蒸蛋白,需知龍蝦好容易過火,而一過了火就像趙擦子膠一樣。幸而師傅既火侯控制得好好,肉質細嫩,墊底的蒸蛋嫩滑是理所當然,妙在加入了羊肚菌汁,自然更為濃香,精彩。

鐵板上的銀鱈魚,師傅會係你面前注入黃酒再點火,視覺得到享受之餘,也多一份香氣。吃之前,再倒入胡椒汁,跟嫩滑的鱈魚亦是相當合拍。底下的京蔥從來不是茄喱菲,幾粒菠蘿更有助解膩,是師傅花過心思的安排。

乞兒雞吃得多,不過位上的,卻是首次見識。扑開外層,看見中間綠色的東東,原來係綠色的餃皮取代了傳統的荷葉,餃子餡則是惹味的咖喱雞,創意十足。再講,呢個外層,查實是牛油皮,也可以食用的,而且酥脆可口。

還以為單尾是傳統的炒麵或炒飯,只係料頭足啲,或者擺盤精緻啲啫。萬料不到,師傅將個飯都可以搞到像Taco咁,即係將芝士炸成個脆盞,盛著芝士蟹肉炒飯,係堅炒飯底,完全係估佢唔到,卻又好食的特別驚喜。

最後的甜品,驟眼看以為是芒果布甸之類的東西,不過吃至此時我深知絕對唔僧咁簡單。原來係南瓜!味道非常濃郁,質感則介乎布甸與奶凍之間,頗為討好。布甸之上還放了些雪燕,那粒波波更加是桂花糕及椰汁黑芝麻所造成的鴛鴦珠,使唔使玩到咁出神入化呀師傅~

今次吃既中式廚師發辦。『嚐藝粵饌』,驚喜連連,大多大多估你唔到既地方,好值得親身體驗下。


餐廳資料:
玉庭
沙田白鶴汀街8號帝都酒店1樓
26943939

2 則留言: