興記麵食家 - 正是我想要的味道

食物：$$$$

環境：$$$

服務：$$$

在我Wish list之中，多半是高級餐廳，太子的興記麵食家，是少數留在我口袋裡的平民美食。

皆因，是位識飲識食的朋友介紹，絕對靠得住。

公開飲食網站指示在深水埗C2出口，步行約七分鐘。真係信佢一成，雙目失明，我都差啲俾佢老點左。

         

牛筋與雲吞，是朋友的推介，我早已牢記著。所以，坐低後便二話不說點來一碗牛筋雲吞麵，加多罐可樂。

呷口湯，不是清鮮而滿載大地魚香的版本。

麵條爽身而沒有惱人的鹼水味，有韭黃在陣絕對有分加。牛筋每一件都很腍身，但膠質豐富，還隱約滲出八角的氣息，是我喜歡的那種質感與味道，果真不錯。

雲吞三粒，個子偏大 (又唔係沾仔記乒乓波雲吞咁樣)，沒有金魚散尾，與麥字頭和何洪記等的老字號風格迥異。然而外皮滑溜，餡料的蝦肉及豬肉比例各半，吃起來甘香爽口，也是我的心水口味。

 由於牛筋與雲吞合心，過幾天經過附近，又來了。今次柯打豬手麵，四小件的豬手，豬皮爽滑帶彈性，內裡夠腍身，也有水準。

再來一碟韭菜花健康下，吃起來嫩口無渣，味道清甜。家陣年紀大左，較喜歡原味無添加，只是象徵式醮點蠔油就好。青年之時，基本上是蠔油浸菜。

飲品選擇唔多，只係罐裝汽水或豆漿等，手沖茶啡都沒有，來罐久違了的可樂也好。

可惜，唔係樽裝，收費竟然要九蚊，Seven價~

再次証明，呢位朋友係信得過，至少口味跟我一致。

講起麵，又心郁郁想去另一間老店，新蒲崗的英記，大家食過未？

餐廳資料:
興記麵食家
太子基隆街51號地下
23912420