Follow me on Instagram

2018年5月6日 星期日

潮興正宗打冷小廚 - 麻甩打冷局



食物:$$$1/2
環境:$$$1/2
服務:$$$1/2

生活營營役役,大家各有各忙碌,而且一個住東一個住西,麻甩三劍俠飯局次數愈趨稀疏,更遑論說要齊齊在長沙灣重溫美味。

難得大家抽到時間,一定要好好珍惜寶貴既機會,有諗過幫襯醉瓊樓,但地膽提出去潮興打冷,我無異議。
   


時間尚早,可以直行直入,仲有枱俾你揀,不過八點過後,人客開始多,是愈夜愈精彩的格局。


打冷不可能沒鹵水,一碟例牌鵝片打頭炮。鵝片軟腍,鹵水味非常出,好有水準,教人停不了口,連埋墊底的豆腐及花生,瞬間被我們清掉,早知要碟大份的喇。


來了一條烏頭,肉質結實,帶點魚油香,証明夠肥美,簡單醮上豆醬,個人覺得已十分美味,可能是太耐沒吃過的緣故。


有人提議食蠔餅,喜歡香口嘢既我立馬舉手贊成。蠔餅披上黃金戰衣,鬆脆無比,內含不少肥美蠔肉,吃得過。


想炒碟菜,問事頭婆有咩靚菜,結果佢推介韭菜咸肉,按她意思吧!韭菜無疑是嫩口無渣,可是咸口又肥又硬,大家只吃清韭菜便算。


不吃飯,不愛粥,倒不如來個糖醋麵?金黃色澤,看賣相無大問題,但質感為什麼咁硬淨?實有點失望。


意猶未盡,找地方吃糖水,結果嚐到硬過我條命的木糠布甸,帶給我們太多歡笑聲。




餐廳資料:
潮興正宗打冷小廚
長沙灣東京街31號恆邦商業大廈地舖
29580333

4 則留言: