禾牛薈 - 新春火鍋三劍俠出動~

食物：$$$1/2

環境：$$$1/2

服務：$$$

今次呢個飯腳組合，比較少見，猶記得上次是迎雞年的團年邊邊，今趟則是狗年的開年飯，同樣是打邊爐，難道我們就是新春火鍋三劍俠？

原來兩位朋友都未試過禾牛薈，那就鎖定目標這裡，尖沙咀店，比較方便大家。

快樂星期五晚上，配合乍暖還寒的天氣，火鍋店是高朋滿座，當然我們是早有準備，預先訂位。

廢話唔多講，選好湯底和配料，便到打邊邊的指定動作 – 混醬。筆者風格不改,簡單配上生蒜，辣椒都唔使加多粒。

    

是晚點的湯底，很適合女士，因為係北海道鮮奶花膠鍋拼瑤枉火腿冬瓜鍋，養顏之選。

打邊爐如沒有牛，我會同你拼過。這夜，前後來了兩碟牛肉，分別是至尊及特級手切肥牛。個人覺得後者質素較佳，至少肉質柔軟，我吞了很多。

但論質素，反而豬要比牛好，這份西班牙黑毛豬片，入口唔怕嚡，帶點肉香，食肉獸表示滿意。

海鮮也是打邊爐的必然配料，尤其是廣東火鍋，沒海鮮不行。又點了鮑魚、蟶子，以及刀貝蜆。鮑魚和蟶子無須淥太耐，否則會韌，現在就是剛剛好，軟腍之餘，亦吃得出應有的鮮味。

刀貝蜆售罄，改而送來蕃薯蜆，還幸水準都唔差。

松葉蟹皇包，是這裡的皇牌推介，逐粒計的，即管每人一粒試試看。感覺有幾分像小籠包，要讚是非常足料，蟹皇及蟹肉澎湃，沾黑醋吃真不賴，不負招牌的名字。

又要了三式餃，分別是韭菜餃、雲吞，以及意式牛肉餃。韭菜餃夠香夠足料，雲吞同樣有大大隻又爽口的蝦，而且好似加入左蝦醬，好特別。意式牛肉餃，那餡真有點像Ravioli。

＂老友鬼鬼＂實在很適合作火鍋配料，輕輕浸過的油條，柔軟之中帶微脆，釀入了彈牙的蝦膠，層次十足，但緊記不要淥太久，過腍了就完全無晒口感喇。

食埋脆鯇、鴨紅和冰豆腐，飽到上心口。要讚冰豆腐唔怕一淥就散開，若有個麻辣湯底在面頭就好了。

下次呢個飯腳組合，會唔會又係打邊邊？應該唔使等一年卦？

餐廳資料:

禾牛薈

尖沙咀金馬倫道48號中國保險大廈1樓及2樓

39973369