海鍋手工涮涮鍋 - 團年暖笠笠

食物：$$$$

環境：$$$

服務：$$$1/2

試問，有咩好得過在寒天下，與好友們齊齊去滾？

是夜，仍未回暖，筆者就與層次豐富的甜魔媽媽、車爸媽，以及農夫Kan來到尖咀的樓上火鍋店打邊邊團年（係呀！又團年呀！），渡過暖笠笠的晚上。

樓上店好難搵？非也，就在加拿芬道恆生的鈄對面，認住視帝黎耀祥個嘜頭就係。

係喎，呢間嘢唔知咩事咁巴閉，搵到視帝做代言人。不難估計，呢度會有唔少明星來幫襯。
         

人齊，點好湯底，又係指定動作，混醬時間。吃辣的有勁香勁辣XO醬、紅椒粒，但我只要蒜泥便好。

臨近過年，且在座女士多，花膠濃湯鍋似乎比較應景，一大碟花膠倒入湯底入，睇見都覺得養顏。

每位都有的海鮮，五人加埋就是一大盆很有睇頭的拼盤。各式海鮮之中，以超巨大，又漲卜卜的桶蠔最為吸引，吃起來十分鮮甜、口感良好。龍蝦又是生猛得在「郁郁貢」的。

作為食肉獸，真懶理在座的朋友吃不吃牛，點都要來一碟（應該是兩碟，因後來再追加了）。雪花紋理唔錯，「起雙飛」切法，令口感更佳。

牛肉出色，豚肉片亦不俗，雖然賣相不怎麼樣，但口感與味道比想像中好。

響玲是自家製，大大碌，很鬆化，輕輕拖一拖，唔須要三秒，已經食得，我幾中意。同樣是脆卜卜的炸魚皮，浸湯又得，懶得浸的話，直接食亦可。

兩款丸類，相比之下，牛丸比較普通，因有隻非常罕見的松露爵士丸，此乃松露與午餐肉及豬肉的配搭，不諱言，我是首次品嚐，層次幾複雜。

韭菜餃與雲吞，個人偏好雲吞多一點。另外，又粗又長的蟹柳，端上桌時還以為是紅蘿蔔，過癮！

蜂巢豆腐，可惜有點散，同埋配麻辣鍋應該會更合適。

食埋鍋內的粟米，就是甜品時間。估唔到會有原個泰國菠蘿做甜品，揸住枝柄，大口大口咬落去，又幾甜喎。

餐廳資料:

海鍋手工涮涮鍋

尖沙咀加拿芬道16號金輝大廈2樓

28869608