新店速遞：與眾不同 - 星空野地皆可??

食物：$$$1/2

環境：$$$1/2

服務：$$$1/2

本想去車品品吃午餐，可是又見佢拉左閘，瞄下佢門口張營業時間通知，原來佢已經進化到只做晚市，佩服佩服！

唯有在附近逛逛睇下有咩食，就在後一條街(即大全街)，遇上一間仍是試業中的小店，主打上海菜，名叫與眾不同。

說過十萬九千次，個人是滬菜控，所以不理三七廿一，好好醜醜也入去試番次。

    

小店格式，裝修與茶餐廳無異，不過紫色的梳化椅，總會有人喜歡。

午餐之蔥油雞飯，水準比預期好。雞是皮爽肉嫩滑，今時今日也不敢苛求什麼雞味，至少沒一陣雪味，反而蔥油十分香。飯也是跟上菜飯，感覺上健康點。連飲品才四十多元的客飯去計，真的交足功課。

另一款套餐，是點心配麵食/飯，當然仲有飲品。我選了小籠包，由於是一人前，所以只有兩粒，實屬很好的安排。小籠包賣相像老店的出品，皮是較厚，湯汁亦不豐盈，但味道還是可以。如果你要吃皮薄多汁夾起盪鞦韆的，這裡之出品不是你杯茶。

擔擔麵不是正宗的四川版本，大大碗的，辣度較為溫和，麻醬味很香，若麵條可以有咬口一點仲好，現在我嫌佢稍為腍身。

食品雖未致於「與眾不同」咁誇，但街坊價錢，一試無妨，再試亦唔使投降～

餐廳資料:

與眾不同

大角咀大全街38號地下

26683351