Mue Mue - 新派泰菜

食物：$$$
環境：$$$$
服務：$$$1/2

朋友相約食晚飯，但選址的責任就落在我身上。

記得有人介紹過美麗華商場的新派泰國餐廳Mue Mue，睇相係幾吸引，一於去試試。

棣屬美記餐飲集團下的食肆，裝潢是不須置疑，餐廳更設有室外地方，酒吧區及水煙區，週末晚上來氣氛相信唔錯。

甫坐低，店員奉來小食，細細的一兜腰果俾大家作熱身。調酒師亦隨即過來打招呼，介紹不同既酒水，然而我倆對酒精從沒興趣，也不要浪費她的時間。

點來香芒蟹肉沙律，還以為泰式的沙律都有一定辣勁，不過呢度個出品，並不刺激，似乎是為迎合港人口味而設。

泰式小食薈萃，可從云云小吃之中挑選三款，商議過後，就要左雞翼、豬頸肉，以及脆皮豆腐。當中最精彩的，肯定係炸豆腐，外皮薄而脆，內裡嫩滑，但吃時要小心燙咀巴。

酒香火焰骨係呢度既招牌菜式，幾乎每枱都會柯打。店員會在席前點火，儀式感滿滿。

大概是泰式火山骨既變奏版，辣勁唔算強，酸酸辣辣是醒胃，肉質唔會好嚡好柴，不過又稱唔上嫩滑，中規中矩吧~

芒果糯米飯就唔多掂，硬轟轟死實實，好睇唔好食，兩球雪糕都無補於事。

或者，叫佢既另一名物，黑糖椰子雪糕，可能會穩陣啲。

餐廳資料:
Mue Mue
尖沙咀彌敦道132號美麗華廣場1期3樓302號舖
98330788