食物：$$$1/2
環境：$$$$
服務：$$$$
話說，778生日聚的首回，AI建議我哋去香港公園的Pondside，大家吃得相當滿意。因此，今回再接再厲，繼續找AI幫忙。
唯一要求，是在中環區，方便超哥之後返工。
得到的建議係Spiga~
餐廳裝潢好靚，地方蠻大的，甚至有露天位置，不過三十幾度的氣溫下，梗係坐係室內涼住冷氣用餐最舒服。
甫坐低，店員便奉來麵包籃，各式麵包新鮮軟熟，grissini脆口，沾上優質的油醋，令大家的期望不其然地提高。
週六只提供四道菜的Weekend Brunch，但拿起餐牌，你必定會選擇困難症發作。幸而，我哋一行五人，可以掃勻前菜頭盤。先講頭盤之一的海鮮拼盤，生蠔、海蝦、螯蝦、青口、蜆及帶子等等，以一人份量的頭盤而言，真的超滿足，當中以青口最為高質。另外的凍肉拼盤，各式風乾火腿、牛肉火腿、莎樂美腸等，配合芝士及果仁，典型的意式享受。仲有番茄莎莎及黑松露麵包，大大粒的檻欖，烤椰菜花等，如此龐大的份量，大家分甘同味，洋溢歡樂氣氛。
再者，前菜都係俾足你。蜆肉、牛肉他他、小牛肉、布袋芝士配番茄、烤青椒、鯷魚麵包、雅枝竹、松露炒蛋等十二款 (我哋五個人合共十五碟)，每樣淺嚐一口，未上主菜已經飽左九成。大家各自挑自己喜歡吃的主菜，再齊齊分享。蜆肉意粉，麵條保持應有咬口，簡單以檻欖油烹煮，已經夠好吃。香煎銀鱈魚，典型意式做法，總之煎至皮香肉嫩，就沒有太多投訴。再來的是雞腿肉，已褪骨，啖啖肉又不嚡口，墊底的薯蓉幾香，但正如朋友說未夠輕身，感覺比較漏。
安格斯牛肉，要求Medium Rare的生熟程度，效果出來尚算嫩口不韌，外層帶微微焦香，伴以長柄西蘭花，不錯吃。許多地方揀牛肉需要加錢，呢度就全部同一價位，又幾好喎！最後一款主菜，大家揀左意大利飯，無論香氣、味道及口感，均贏得大家歡心。一致認為，幾款主菜，比起頭盤前菜更有水準。然而，最吸引大家的，毫無疑問就是內容豐富的甜品餐車。提拉米蘇、意式奶油筒、朱古力慕思蛋糕、蘋果批、香蕉花生芭菲、蝴蝶酥及鮮果等，大家想吃什麼說出來就可以，真係好開心的。全員通過，香蕉花生芭菲，是甜品中的冠軍！餐後飲埋杯咖啡，悠悠然地渡過了三小時快樂時光。
沒有留言:
張貼留言