海外篇：中峇魯市場 - 尋訪地道美食

食物：$$$1/2
環境：$$$$
服務：$$$1/2

今趟的獅城遊，沒吃太多貴價嘢，主要都是在各個巴剎打滾，吃些當地人會經常幫襯的地道美食。

其中一個有到訪的巴剎，是中峇魯市場。

睇番自己既Blog，原來對上一次來這個市場，已經係十幾年前既事。再對比番照片，市場的外觀是稍有不同，証明當地政府會久唔久作出翻新  (可按此回味!)。

再睇睇內籠，依舊是整潔衛生，環境確實比香港大部份的熟食中心要好。

同樣有光顧中峇魯鹵麵，這檔是其中之一的人氣店。

鹵肉、五香、炸雲吞及芽菜等，配上黃麵，同埋濃濃像碗仔翅湯，十多年前我曾說過自己不懂欣賞，不過今次再嚐，我又幾喜歡喎！的確，口味是會隨著年紀和歷經而有所轉變。

另外買了楗柏的水粿，這檔是連續多年獲得米芝蓮推介，相信一定有番咁上下實力。

要左個套餐，既有水粿，亦有幾粒燒賣。所謂水粿，即是蒸米糕，本身無乜味道，因此要連同頂頭那些肉碎及菜甫等一齊食。米糕綿密的質感，結合家常菜甫等味道，筆者是蠻喜歡的。至於豬肉燒賣，還是在香港吃就好。

新加坡天口熱，好想來些凍飲，這杯熱情果與橙汁的混合體，真材實料，一啖吮幾口，無比受用。

餐廳資料：
中峇魯市場
30 Tiong Bahru Road Singapore