鮨處松戶 - 彩星的奇蹟

食物：$$$1/2
環境：$$$$
服務：$$$$

五月份都有幾位朋友生日，所以今餐是另一位朋友的生日飯，主角話想食日本嘢。

腦海浮現了彩星中心這幢大廈，裡頭的幾間日本餐廳，明明都是頗有水準，但多年來生意卻非常淡靜。不過你唔好理，佢又可以屹立到依家。

是次目標，係八樓的鮨處松戶，睇番紀錄，筆者對上一次到訪，已經是五年多前。

店員推介日本生蠔，拿拿臨先來兩隻。個子比想像中要大，飽滿爽身，自行擰些少青檸汁吃，有幾分像令和之怪物的影子。

主角對刺身類特別有興趣，卻又拿不定主意，即管來份雜錦刺身，滿足佢多個願望。

除左海膽是加拿大膽，其餘的都是好新鮮的好東西。餐牌明明寫著是赤身，或許店員聽到有人話到對赤身麻麻，竟轉了入口溶化的拖羅，主角即時喜上眉梢。

餐牌又有一道松戶特製中卷，連店名也用上的出品，應該靠得住，所以其實我無理佢係咩食材，也就點了。

原來是包裹著帆立貝、吞拿魚茸、海膽及三文魚籽的卷物，由於食材新鮮，吃起來都一定唔會伏，海膽比刺身拼盤的會再好一些。

起初打算吃完刺身，再來些熱食，不過細食既我哋，已再沒有食力，叫份紅豆年糕就好了。

煙煙韌韌的口感，配上紅豆也肯定穩陣。

餐廳資料:

鮨處松戶

尖沙咀廣東道100號彩星集團大廈8樓

31064468