個園竹語 - 償願

食物：$$$$
環境：$$$$
服務：$$$$ 

收到好朋友的短訊，約夜晚食飯。唔使食自己，我梗係𦧲飯應喇~ 但，臨時臨急，食咩好呢?

忽然好想食小籠包，腦海浮現一個店名，個園竹語，即管搏一搏睇下有無位。

食神眷顧，可以直行直入，還被安排坐係卡位，太好了！唔通連個天都中意我? 哈哈哈～

冷盤之中，我最愛的並不是醉雞，或者肴肉，而係油炆筍。爽脆無渣既筍尖索盡醬油之精華，夠晒入味，我個人可以獨食一碟。

素鵝要趁熱食，放久了外皮會變韌。立馬放一件入口，外皮香脆，完全唔韌，加上滿滿的菇粒作餡料，調味恰宜，也是不錯。

期待已久的小籠包終於登場，一籠五隻，收口位是大左啲，但總算是皮薄而湯汁豐盈，味道亦不俗，我吞下了三隻。

鍋貼是朋友指明要點的，一碟三隻，形狀可以。煙韌不黏牙的外皮，加上鮮香之肉餡，同樣是好，若然底部再煎脆些少，會更迷人。

又叫左半隻雞，肉質是超級嫩滑，面頭香到不得了的乾蔥，收畫龍點點睛之效。

兩個細食之人，竟然可以清掉桌上的食物，仲係截單前柯打埋甜品，香蕉高力豆沙。

鬆軟的外層，豆沙跟香蕉作餡料也從來不會失望，多番丁點豆沙餡會更出色。呢味甜點，記緊要趁熱食，否則效果會大打折扣。

食下傾下又十點，阻人收工猶如殺人父母，快快趣埋單走人！

餐廳資料:
個園竹語
尖沙咀廣東道25號海港城港威商場3樓3202號舖
21168328