2023年4月17日 星期一

Caprice - 始終如一



食物:$$$$
環境:$$$$
服務:$$$$ 

愈來愈無記性,趁老人痴呆症未到十級嚴重時,紀錄番今餐的Fine Dining 體驗。

Caprice,連續多年的米芝蓮三星,最近公佈的Asia's Best 50 Restaurants,亦榜上有名,筆者對上一次來,已是N年前的事。

環境一如以往的高雅,落地玻璃面對住維港景致,比起Amber等更為優勝。

甫坐低,店員便拿來一系列的麵包給我們選擇,各個款式都好吸引,但細食既我要留肚品嚐五個Course的午餐,所以只拿了一隻最出名的芝麻包。香脆,牛油香滿溢結合芝麻的氣息,塗上原味或鹽味牛油,的確好好食,好想encore,不過我提醒自己要留肚。

點好餐後,Welcome Food也奉來,是紅菜頭薄片包裹著的帶子刺身,咬落爽而鮮味十足,沾上旁邊一點又一點之熱情果醬,有助增強食慾。

頭盤係牛肉他他伴法國生蠔配魚子醬,用上澳洲和牛去做,混埋打碎了的蠔肉,味道比想像中濃郁,與頂頭咸香的Kristal魚子醬相當夾檔,今次旁邊的點點汁醬,則是茴香與蛋黃醬,令牛肉他他的鮮味又為突出。

朋友的頭盤,是龍蝦伴蘑菇奶凍,龍蝦肉爽而不韌,蘑菇奶凍比預期更加濃郁,滲出絲絲八角的特質,同樣精彩。

之後是湯。鴨肉清湯本身已好合我心水,三粒的意大利雲吞,是以鴨肝作為餡料,煙韌既外皮襯托濃郁的香氣,比起坊間傳統的Ravioli,好吃百倍。

芹菜頭濃湯因為加入了大量蘑菇蓉以及巴馬森芝士,味道是比外觀重口味得多。

來到海鮮項目,法式魚肉慕絲極之細滑,卻不失魚既味道,香檳汁亦令成件事更上層樓。事實証明,鬼佬煮魚也不一定只是香煎的。

法國藍龍蝦的火候控制恰到好處,肉爽而沒半點韌,我發覺廚子都幾喜歡用紅菜頭,除了剛才的Welcome Food,今次龍蝦旁邊亦是紅菜頭,還不特止,在吃龍蝦之時,點解個汁醬濃郁得來又帶微甜咁正斗的呢? 原來這是朱古力配紅菜頭汁,好有心思好精彩。

海鮮之後就是肉。我揀的自當是牛吧!用刀輕輕一切,已深知牛臉頰是超級軟腍,紅酒肉汁與牛臉頰肯定合拍,再配埋蘑菇及脆薯塊,好耐無見過賣相如斯精緻的牛肉菜色。

相比之下,黃油雞的賣相平實得來,但肉質再沾上奶油汁,味道是一等一的好。都話廚子好中意用紅菜頭的喇,呢碟又見到紅菜頭的蹤影。

法國餐的甜品,賣相毫無疑問是相當誘人。士多啤梨乳酪慕絲猶如一朵盛放著的花,加球草莓雲尼拿雪糕,要影多幾張相先捨得食。

梳乎厘是朱古力口味,勝在濃香,口感尚佳。

食埋精緻的Petit Fours,再飲杯香濃的咖啡作結,今趟既體驗與N年一樣,來得非常滿意。

還碰上了數年沒見的朋友,開心!


餐廳資料:
Caprice
中環金融街8號香港四季酒店6樓
31968860

2 則留言: