2022年12月12日 星期一

Ole - 異國風情迎聖誕



食物:$$$$
環境:$$$$
服務:$$$$ 

臨近聖誕,飯局自然多,呢個時候,食西餐當然比較貼題。

今次,就去左本地一間老牌既西班牙餐廳Ole開餐。

幾時先真正復常不得而知,但以家總算可以有樂手為客人高歌,感覺是添了一點氣氛。

到訪當日,剛巧推出冬季節慶Brunch,每位$588。另加$198,就可以有果汁、汽水、Sangria等既free flow

套餐有齊六款Tapas,咸香既風乾火腿配番茄醬包肯定穩陣,佢仲放左啲芝士和火箭菜係面,我中意。

西班牙青椒仔又係其中一款經典小食,店員話呢種做到『虎皮』既青椒仔,十隻之中有一隻會特別辣,好睇彩數,不過今次我哋食既呢兜,無一隻係辣的。

有食過西班牙菜既朋友都肯定食過蒜片蝦,蒜片夾住爽彈既海蝦食,夠晒惹味,欖油都千祈唔好浪費,用麵包索晒啲精華,一流。

將八爪魚切粒,放在薄薄的薯仔片上,配以自家製既蒜茸蛋黃醬,煙韌醒胃好食。

跟住嚟既蟹肉多士,蟹肉成份超多,結合番茄醬、白蘭地等等焗到香濃可口,配脆多士肯定好味。

有蘋果粒去中和鵝肝既油膩感,連罪惡感也同時減低。

主菜有豬牛羊魚既選擇,當然仲有招牌既西班牙海鮮飯。個海鮮飯煮到入晒味,散發番紅花既清香,再混入埋八爪魚粒等,口感亦佳。面頭的兩隻西班牙紅蝦絕對是焦點。超多羔,肉質細嫩又勁鮮甜,食到舔舔脷。呢個兩人份既西班牙海鮮飯要加$48,但我強烈推介大家去試。

甜品當然少不了鬼佬油炸鬼,Churro做得鬆脆,沾上朱古力漿,經典既味道。

店員會在焦糖布甸上點火,不過是儀式感大於實際。香脆之焦糖面結合細滑又帶有橙香的出品,味道比想像中更勝一籌。

慢慢食下傾下講下,好快又三個鐘,飲埋杯咖啡,係時候上路。


餐廳資料:
Ole
中環雪廠街24-30號順豪商業大廈1樓
25238624


2 則留言: