2022年12月21日 星期三

沙田18 - 放肆一夜



食物:$$$$
環境:$$$$
服務:$$$1/2

大大話話都有三年無來過沙田18開餐,再次踏足此地,就係要重溫呢度既火焰叉燒配豬油撈飯,與及片皮鴨。

食片皮鴨隨時可以,但想吃火焰叉燒就最少要六個人,同埋坐房,先能夠食到。

說是慶聖誕又好,做冬也好,同圍內朋友慶祝生日亦好,總之找個藉口,一班朋友前去食餐晚飯,要多謝搞手預先寫好菜單,我哋可以餸來張口。

先來三碟頭盤,海蜇頭與木耳那不同程度的爽脆口感,加埋老醋既調味,醒胃有層次。

菠菜細嫩,呢度既麻醬真是超級的濃厚杰身。帶子及牛油果以紫蘇、蒜及醋去調味,單獨吃都唔錯,但結合起來又好像擦不出太多火花,有種同床異夢既感覺。

食完頭盤熱身過後,主角之一既片皮鴨要隆重登場了。師傅將隻鴨抱出來讓大家影相後,便開始手起刀落將鴨皮片落嚟。食過既朋友都知道,呢度片出淨片、淨肉,以及連皮帶肉三款。

淨皮既,配上砂糖同吃,有入口溶化既感覺。

另外兩款,以麼麼皮包裹著,連埋青瓜、大蔥及鴨醬,雖與巔峰時期稍有出入,不過一向愛吃片皮鴨既我,絕對收貨,尤其佢既麼麼皮夠軟熟可口。

接下來是茶葉煎焗軟穀蝦,上桌時茶燻香氣先聲奪人,蝦是香脆得連殼都可以食埋,但肉質仍保持爽彈。

砵酒焗蠔,用上的是美國珍寶蠔,身型飽滿,香氣撲鼻,連埋京蔥大啖咬落去,惹味好吃,大滿足!

咁豐富又邪惡既一餐,來碟乾蔥鮮竹撈芥菜去平衡下,是有必要的。

千呼萬喚,主角既玫瑰露叉燒終於出場。師傅同大家打過招呼之後,就作出準備,沒多久就見火燒熊熊,三條叉燒著晒火,酒香四溢,非常吸引。

三數分鐘後,燶邊的玫瑰露叉燒完成,大家都跟師傅說要免切。其實肉質鬆化又燶邊的靚叉,真的不用切,大口大口咬落去,齒頰留香。

大家再按各自喜好,自行加入豬油及豉油,呢砵蒸飯,連埋叉燒,絕對係天堂級既美食,食完又向天堂邁進一大步。

之後是一大堆各式各樣的甜點及壽桃包,如南瓜薑汁法式燉蛋、椰子石榴雪葩等,甜咸胃都係超滿足既一晚。

呢間,真係湊夠人來,單係食一味火焰叉燒,已經值回票價~


餐廳資料:
沙田18
沙田澤祥街18號沙田凱悅酒店4樓
37237932

2 則留言: