食物：$$$1/2
環境：$$$$
服務：$$$$
好朋友移居英國既日子已進入倒數階段，把握機會見多一次得一次。
問佢有咩想食，答案係海膽同埋秋刀魚。識做！嗱嗱臨搵間日本餐廳，又有人幫手訂兩條秋刀魚，一切安排妥當。
施施然搭叮叮過來，時間岩岩好。
中意食粟米既我，見到Corn
Ribs就唔客氣，要來一客。烤得又香又甜既粟米，本身已經好好食。反而個味噌牛油打造而成既汁醬，偏甜，有少少蓋過主角既優點。但其實都好味道既，我食左兩件。
好多人唔喜歡茄子嗰種軟爬爬既質感，但我又OK喎！尤其是以日式甜味噌來做的田樂燒茄子，甜甜地好惹味。
店員走過來，問我哋預訂左既秋刀魚，想點樣既食法。主角毫不猶豫就話係刺身，我當然贊成。十月尾十一月頭正值食秋刀既好時機，魚肉肥美鮮甜，你可以點豉油Wasabi來吃，不過我更推介沾薑蔥醬油，同秋刀係好夾。
輪到主角既海膽出場。先是海膽多士配松露醬。將鮮味爆燈既北海道海膽在放鬆脆的多士之上，又點可能會唔好食?
大廚更加加入左松露醬，香氣自然更勝一籌。
另一款係牛骨髓海膽麵。炒麵底，撈堆海膽汁，同埋些少中式既甜醋，仲有新鮮的北海道海膽係上面。單是呢個麵，都已經想像得到有幾好食。不特止，師傅仲放枝牛骨係旁邊，俾大家用牛骨髓來伴麵。枝骨其實都幾熱，拎起既時候要小心燙手。烤制過既牛骨髓撈麵，油份重啲，又香口啲，不愧係店家既招牌菜色之一。
跟住嚟既北海道白金豬腩，厚切，少少燶邊，甘香，但真心偏肥。師傅都好明白，所以用柚子胡椒來中和肥膩感覺。
呢度其中一款出名既魚，係立麟燒甘鲷，但我哋今次無點到，而係要左黑鱈魚。黑鱈灸既油份豐富，肉質嫩滑，配甜甜地既蜜糖芥末醬，不錯吃。
最後都點番個甜品作圓滿終結。抹茶朱古力心太軟，切開既時候，確係有抹茶『溶岩』流出嚟既，但總體味道係以朱古力為主導，伴以一球雲尼拿雪糕，我幾中意的。
秋刀魚刺身正呀，仲幾大碟咁喎，滿足！
回覆刪除大滿足
刪除