食物：$$$1/2
環境：$$$1/2
服務：$$$1/2
當大家週圍去搵出色既海南雞飯，我就還原基本步，去返被譽為全城最強的海南雞既Grand
Cafe，止一止我既星馬菜癮。
雖然被安排坐窗口位，但對住個搞左十世都未整好既爛地盤，真係坐邊都無乜所謂。
店員奉來的麵包籃，各式熱暖既麵包軟熟可口，但要留肚只能淺嚐，食唔晒既就打包返屋企做晚餐。
諗住大家分甘同味，就叫唔同既嘢食，試多幾款。凱撒沙律就係羅馬生菜、煙肉粒、蒜頭、芝士及麵包粒等，好正宗既做法。
蕃茄湯用上了大量新鮮蕃茄，味道偏酸，但總好過以茄膏做成既化學味道。湯頭夠熱，加上羅勒、水牛芝士及麵包粒等，係天然開胃既。
頭盤其實也有中式的選擇，係烤麩。木耳、筍、青豆、杞子等伴烤麩，賣相幾靚仔的。從來中意呢款上海既頭盤，木耳清爽，軟腍烤麩像海綿一樣，夠晒入味。
三款主菜，其中之一係龍蝦潛艇三文治。用上竹炭麵包，配以香草及菜蔬等的龍蝦包，賣相幾好。咬一啖，龍蝦肉是爽彈不韌，但以牛油果及香蒜牛油打造而成既汁醬好咸，就連我呢個經常出街食飯，吃得重口味既人都覺得好咸，就真係出問題喇。
喇沙好大碗，幾大隻蝦、魚片厚切、豆卜及雞肉等，看上去是對辦既。可是湯頭椰香不足，缺乏層次，亦因為咁，豆卜及魚片等索味既東西亦大打折扣，唯獨是辣鮮大隻既蝦係比較出色。
主角始終係海南雞飯，依舊係伴上油飯、雞湯，以及三色醬。據說係用上三黃雞，肉質是嫩滑，雞皮爽，都有啲雞味，唔係差，但與我多次來嚐過的，好似有少少退步。三色醬之中，辣中帶甜的辣醬最為出色，我一向喜歡的甜醬油，就穩穩陣陣咁喇。
油飯既香茅氣息幾突出，反而雞油香比較薄弱。雞湯則幾有瑤柱既香氣。
甜品可揀西餅或者雪糕/雪葩。啤酒雪糕也真的似樣，但我更喜歡我既芒果糯米飯口味，好味之餘，連煙韌口感也很像真。
Opera濃郁之餘唔太甜，幾有層次，有水準。
咪以為三道菜唔飽，其實飽到上心口，要飲番杯Earl
Grey 來消滯。
個龍蝦包好有田園風味呀😜
回覆刪除但食起嚟好唔田園
刪除海南雞飯看上去唔多吸引！
回覆刪除同我Ｎ年前食個時感覺一樣
刪除