2022年6月1日 星期三

金燕島潮州酒樓 - 老字號



食物:$$$$
環境:$$$$
服務:$$$$ 

金燕島,有番咁上下年紀既朋友會唔會覺得呢個名字似曾相識? 其實佢大概就係以前金島燕窩潮州酒樓,係老字號嚟,以前幾威水既。

廢話少講,飲杯功夫茶後,就開始食嘢。都係叫啲大路嘢,香口既蝦棗與蟹棗,外香脆內柔軟,還有馬蹄的爽脆口感,唔錯既。平時食嘢我唔太沾醬汁,不過食蝦棗蟹棗就一定要配潮州甜醬和桔油,才有那風味。

食潮州菜又無理由唔食鹵水既。好彩在座既朋友同我口味差不多,可以放心吃鵝肝。另外也要了鵝片,合晒我心水。鵝片皮爽,肉質結實但唔韌,鵝肝則十分細滑,沒有筋。鹵水係用番以前金島既鹵水膽,自然出色。始終食鹵水嘢要去番老字號,那陳年的鹵水膽係替代不了的。食一件墊底既豆腐,就可以完全感受到鹵水膽的威力。

川椒雞是我指明想吃的菜色,雞肉從來咁軟滑入味,食極唔厭,加埋酥脆既珍珠葉,我真係好中意食呢味餸。

原本想食香酥芋茸鴨,不過以我哋三個人既食力,應該搞唔掂,唯有改吃芋茸帶子盒。外層酥脆輕盈,芋茸軟滑,夾係中間既帶子係口感上作出貢獻,整體味道反而偏淡口。

之後就是甜品時間,原來有馬豆糕送,早知就唔叫兩款甜點咁多。都算係清甜滑溜既,送既就唔要求太高喇~

我食潮州菜既目的,某程度上都係為左碗芋泥。有人肯同我些牙,實在太開心。香甜,加埋鬆化既福果,真係無得頂。芋泥一定要用豬油推先夠香,呢度就係喇!

芋泥其實都幾甜架喇,不過有更甜的,就係油粿。金黃色水幾靚仔,咬落香脆而仲帶點煙韌,餡料係砂糖和花生,甜到漏,但我中意。

全晚都係我中意食既嘢,而且店家水準又高,真心滿足。


餐廳資料:
金燕島潮州酒樓
尖沙咀寶勒巷18號Oasis Avenue 香港粵海酒店1-2樓
23220020



4 則留言: