Kuro Shabu - A4黑毛和牛餐

食物：$$$1/2
環境：$$$$
服務：$$$1/2 

鐵板燒、壽司刺身等經常會食，但Shabu Shabu就真的甚少吃。

朋友忽然問有無興趣，好即興咁又促成了一局。

第一次來，小試牛刀，要左份A4黑毛和牛套餐，同埋黑豚套餐。但，點解無得揀湯底呢?

湯底只得昆布加井水，雖然你可以話靚和牛用清水烚都會好食，不過我都係想要有湯底囉，鰹魚湯都好丫~

先睇下個和牛套餐，有個部位分別係足外則肉、上肩胛肉，以及里脊肉，雪花紋理分佈算均勻，收你三舊水係交到功課。其實咁薄既牛肉，分別唔會太大。相比之下，細嫩既里脊肉最岩我心，其次係肩肉。

三款豚肉係腩肉、肩肉及里肌肉。坦白講，睇都睇得出，肉質唔算好上乘，所以淥既時候要更小心，一過火就會好嚡口。

套餐會跟蔬菜拼盤，粟米、紅蘿蔔對我來說比起旺菜及什菇等更吸引，好甜美。

浸埋個烏冬，確保夠飽，但我寧願要個白飯。

臨尾那煙煙韌韌既蕨餅，反而幾好食。

餐廳資料:
Kuro Shabu
上環荷里活道108號聚賢居地下C號舖
28322028