大班樓 - 最高規格的farewell局

食物：$$$$
環境：$$$$
服務：$$$$ 

近呢兩年，食得最多既係Farewell飯，愈來愈多朋友離開香港。

大班樓呢個名字響噹噹，相信大家未食過都聽過，係米芝蓮一星餐廳之外，亦係Best 50全港排名最高的餐廳，以非酒店中菜廳而言，實在難能可貴。

以大班樓去Farewell個識左廿幾年既朋友，合適不過。

先來兩款頭盤打開胃口，九層塔醃漬蕃茄，賣相平實，雪梨爽脆，蕃茄清甜多汁，而且兩者也吸收了酒香，鮮香醒神。

另一款係我指明想食既蜂巢芋泥煙鴨盒，外層酥脆不油，芋茸細滑又夠香，加埋煙燻過的鴨肉粒，口感豐富，味道比我喜愛的芋角更加精彩。怕膩既話可沾些意大利陳醋，但我就覺得咩都唔使加係最好。

朋友預先每人留左隻陳咸檸檬蒸蟶子。咸檸檬這東西，那咸酸的味道不是人人接受到，不過我就幾中意，尤其是配以爽脆的蟶子，不單完全無違和感，更能引出其鮮味，連埋索晒味既粉絲放入口，好想 『安哥』一隻，甚至兩隻。

接著係未食過等於無嚟過大班樓既經典菜式，雞油花雕蒸花蟹陳村粉。紅花蟹蠻大隻，肉質飽滿鮮甜，花雕與雞油比例怡好，一上枱已經好香，又沒半點苦味，師傅加上既蜆汁更是神來之筆，鮮上加鮮。索盡精華既陳村粉，人人都知唔可以錯過喇。

再來的蔥油貴妃雞，頂頭如小山丘既蔥油成亮點，真係勁好食，每一件雞都會夾一大堆才行。當然雞本身都好高質，雞皮薄而肉嫩，好食。

通街都食到既咕嚕肉，呢度就將佢做得再出色。用山楂烏梅及意大利陳醋來做醬汁，酸甜平衡得宜，味唔會話過搶，平凡中見真章。

頂級既食府，廚子係會一絲不苟，芥蘭去皮，長度條條相若，吃起來清甜，爽脆而不硬，與梅菜的咸香擦出了火花。

甜品方面，朋友點的桂花杞子雪糕，以及麻蓉包，據聞都好有驚喜，但我就沒有試了。

生磨杏仁茶確有好香杏仁味，香甜美味，係完美既終結。

餐牌上找不到魚翅、燕窩及海參，卻能夠做到蜚聲國際既名聲，連續多年獲得驕人成績，這，絕不是僥倖。

價錢不便宜，但絕對物有所值。

餐廳資料:
大班樓
中環九如坊18號地下
25552202