2022年5月1日 星期日

川流 - 久違了的火鍋聚



食物:$$$1/2
環境:$$$1/2 
服務:$$$1/2

雖然無話中午唔可以食火鍋,不過烚下烚下呢個動作,都係夜晚做才更盡興。所以一恢復晚市堂食,即刻同大家去川流打邊邊。

點好渺湯底及食物,店員隨即奉來免費既Welcome Drink,係茉莉桃橙和麻辣荔枝烏龍,幾過癮。

湯底滾起需要時間,食住胡椒餅和涼菜慢慢等。胡椒餅鬆化之餘,精髓係用上柬埔寨既貢布胡椒,香氣與別不同,推薦大家試試。

麻辣鴨血個味型對辦既,但切得比較細粒,影響左少少口感。川北涼粉夠滑,辣得來清爽。蒜泥白肉贏在肉質,唔會乾柴柴,辣味加埋蒜香,岩我心水。

要左個鴛鴦湯底,酸菜魚湯及珍菌番茄豆腐濃湯鍋,另外加多個辣推出既三十三香辣火焰醉雞鍋。

鋪滿辣椒花椒的醉雞鍋,對於辣友而言係吸引既。店員會即場淋玫瑰露,引出火焰,已經完全考慮晒打卡既因素。唔中意玫瑰露嗰種味既話,亦可選干邑或冧酒,好鬼Flexible

雞件長期保持嫩滑,辣勁沒想像中強,而是滲出陣陣麻香,與及點點的酒香,廚子好聰明咁加左茄子及蒟蒻兩款索味既東西墊底,自然精彩。

酸菜魚個湯底都唔錯,酸酸地又微辣幾開胃,我個人會喜歡酸菜魚多於水煮魚。

睇下啲配料,蟶子皇爽脆,建議放唔辣既湯底。鱔片肉質實爽好味,亦無細骨,比預期中更好。蝦丸當然係手打,口感彈牙,特別在於個酒香,打邊邊食醉蝦丸我都係第一次。

香港人打邊爐又點可以無牛,點來份拼盤,不過其實幾款之中,簡單既牛頸脊始終係最合心意,呢度既牛都好軟滑出色。

辣友意猶未盡,整碟苕粉放入麻辣鍋那邊,將佢既精髓一滴不剩吞晒落肚。

最後食埋韭菜餃、松茸野菌福袋和藐菜籃,飽到上心口。

要分兩枱始終未夠盡興,等限聚令再放寬,到時可以八個人圍埋一枱食,仲爽!

餐廳資料:
川流
灣仔太和街28號灣仔薈賢居地舖
31266633

4 則留言: