2021年9月13日 星期一

90s Lazy - 慵懶?



食物:$$$1/2
環境:$$$$
服務:$$$$ 

大家點睇九十後?

慵懶、無責任感、抗壓能力差的職場新鮮人?

雖則我是遇過類似的九十後,但其實我覺得更多的九十後,係好有主見、充滿幹勁、創意無限既青年人。

再講,家陣千禧年代既後生仔女,有啲都做左幾年嘢,如果你仲認為九十後係剛畢業出來的新力軍,証明你已跟時代脫節喇~

扯遠左,其實我係想寫呢間樓上咖啡店90s Lazy。店子叫得呢個名字,相信主理人是一班九十後吧!

炎炎天氣,煙三文魚菠菜忌廉汁濶條麵大概是幾合適的選擇。汁醬唔會過份地多,濶麵保持咬口,煙三文魚跟菠菜及菇的組合,感覺清新。正如朋友所講,人在旺角的樓上Cafe,會自不然地降低要求,雖然這諗法絕對唔正確...... 呢份出品,已經是高分之作。

講懶,毫無疑問我比很多九十後、零零後更加懶,所以餐牌中出現的懶人包,岩晒我。所謂的懶人包,即是港式的全日早餐吧!煙肉、焗豆、燒烤腸,以及薯餅都是沒考什麼功夫的現成貨,不過有香脆的薯餅食,我已好滿足。炒蛋是嫩滑的,用上的是優質菜蔬,也看得出店家的誠意。如果牛油多士可以轉成丹麥酥,我會更喜歡。

本想飲咖啡的,但天氣實在太熱太熱,汗流浹背既我忽然對凍飲有更大興趣,因而放棄了咖啡,改飲杯白桃沙冰,爽呀!

被慵懶的氣氛感染了嗎? 回去要睡個午覺才行, 哈哈~


餐廳資料:
90s Lazy
旺角山東街50號1-2樓
23410288



4 則留言: